Rasman: Ronaldu yangi shartnoma tuzdi va bu oxirgi klubi bo‘ladimi?

Portugaliyalik afsonaviy hujumchi Krishtianu Ronaldu yoshi qirqdan o‘tgan bo‘lsa ham to‘p tepishni to‘xtatmoqchi emas.

Saudiya Arabistonining “An-Nasr” klubining rasmiy saytida  Ronaldu riyodliklar bilan yangi shartnoma imzolagani e’lon qilindi.

Unga ko‘ra, 40 yoshli hujumchi yana ikki yil davomida “An-Nasr” sharafini himoya qiladi.

“Sporting” tarbiyalanuvchisi bo‘lgan Ronaldu ilgari “Top-5” ligalarida “Manchester Yunayted”, “Real” vat “Yuventus”da o‘ynab, milliy va xalqaro miqyoslardagi musobaqalarda muntazam g‘olib chiqishga ko‘nikkan o‘yinchi hisoblanadi.

Biroq besh karra “Oltin to‘p” sohibi 2023 yilning yanvarida “An-Nasr”ga kelganidan beri to‘purarlik mahoratini namoyish qilib kelayotgan bo‘lsa-da, klubi bilan biror nufuzli sovrinni qo‘lga kiritgani yo‘q. Shunga qaramay, Ronaldu 2027 yilning 30 iyunigacha ushbu jamoada qolishga qaror qildi.