Равшанбек Умурзақов мағлубиятни қандай изоҳлади?

Хабарингиз бор, кеча Россиянинг Екатеринбург шаҳрида RCC промоутерлик компанияси томонидан профессионал бокс оқшоми ўтказилди. Ушбу кечада енгил вазн (61,2 кг) тоифасида фаолият юритадиган Равшанбек Умурзақов (12-2, 7 КО) ҳам рингга кўтарилди.

У мағлубият билмай келаётган украиналик Зоравор Петросянга(10-0,4 КО) қарши жанг олиб борди. 8 раунд қилиб белгиланган ушбу жанг тўлиқ давом этди ва ҳакамларнинг қарорига кўра, ғалаба украиналик чармқўлқоп устасига тақдим этилди. Шундай қилиб, Равшанбек иккинчи мағлубиятини қабул қилиб олди.

Биз ушбу жанг борасида Равшанбекнинг фикрларига қулоқ тутдик.

- Мағлубият билан ўзимни оқлаш ниятида эмасман. Барча эътиборим, бир зарба билан жангни якунлашга қаратилиб қолди. Мақсадим аввалги мағлубиятдан кейин чиройли тарзда ғалаба қозониш эди. Битта кучли зарбани йўллашни ва ўша имкониятни кутишим якунда, хато бўлиб чиқди. Бунинг учун мени қўллаб-қувватлаган барча мухлислардан узр сўрайман. Барчаси Яратгандан ва ўзимнинг ҳаракатимга боғлиқ. Кетма-кет мағлубиятлар мени синдира олмайди. Чунки, айтиб ўтганим каби ғалаба ҳам мағлубият ҳам Аллоҳдан. Бу мағлубиятлардан керакли хулосани чиқара оламан ва кучли бўлиб қайтаман!