"Реал" - "Севилья": Меҳмонлар ҳисобда олдинга чиқиб олди! (матнли трансляция)

Ассалому алайкум, қадрли футбол ихлосмандлари! Испания Ла Лигаси 35-туридан ўрин олган "Реал" Мадрид - "Севилья" учрашуви матнли тарзда эътиборингизга ҳавола этилади.

• 90+7'
  

  Учрашув якунланди. "Реал" - "Севилья" учрашувида "Атлетико" Мадрид ғалаба қозонди!

• 90+6'

  Каземиронинг зарбасидан кейин тўп устун ёнгинасидан ўтиб кетди. Бугун "қироллик клуби"га омад етишмади.

• 90+5'

  Сўнгги сониялар, "Реал"яна ҳужумда...

• 90+4'
  

  ГОООООООООООООООЛ! Тони Кроос ҳисобни тенглаштирди!

  Крооснинг олис масофадан берган зарбаси рекошет натижасида дарвозадан жой олди.

• 90+3'

  Зидан шогирдлари сўнгги дақиқаларда катта куч билан олдинга ўтмоқда.

• 90+2'

  Жарима майдонига етказиб берилган тўпни Буну биринчи уринишда ушлай олмади. Бироқ унинг атрофида мадридликлардан ҳеч ким йўқ бўлгани учун тўпни ушлаш муаммо туғдирмади.

• 90'
  

  Ўйиндаги тўхталишлар учун 6 дақиқа қўшилди.

• 89'

  "Реал" футболчиларининг сўнгги дақиқалардаги ноаниқ ҳаракатлари кўпайиб кетди.

• 87'

  Крооснинг узатмасидан кейин Одриосола тўпни тўхтата олмади.

• 85'

  Ўйин якунига бир неча дақиқа қолган бир пайтда, меҳмонлар тўпни ўзларида ушлаб турибди.

• 84'
  

  Азарга нисбатан қоида бузган Гудель огоҳлантирилди.

• 82'
  

  Фернандо майдонда ётибди. Унга тиббий ёрдам кўрсатилмоқда.

• 81'

  Милитао жамоасининг қимматли вақтини кўкка совурди. Унинг жарима майдони ташқарисидан берган зарбаси анча ноаниқ кетди.

• 80'

  Эден Азарнинг жарима майдони марказига берган узатмасига шериклари ета олмади.

• 79'
  

  Винисиус Жуниор ўз ўрнини Эден Азарга бўшатиб берди.

• 78'
  

  ГООООООООООООЛ! Ракитич жамоасини ҳисобда олдинга олиб чиқди!

  Ўзидан ўнг томонга зарба йўллаган Иван Куртуани ожиз қолдирди.

• 77'
  

  Видеотакрорларни ўз кўзи билан кўрган ҳакам "Реал" дарвозаси томон пенальти белгилади.

• 76'

  Ҳакам ВАРни ўз кўзлари билан кўриш учун майдон четига келди. Қизиқ вазият, ҳар икки жамоа дарвоза томон пенальти белгиланиши ҳеч гап эмас.

• 74'

  Бирга-бир вазиятга чиқиб, дарвозабонни алдаб ўтган Бенземани Буну йиқитди. Бу 100% пенальти, бироқ аввалроқ тўп ўз жарима майдони ичида Милитаонинг қўлига текканди.

• 73'

  Чап қанотда фаоллик намойиш этган Акунья бурчак тўпи ишлаб олди.

• 72'

  "Реал" қанотлардан максимал даражада фойдаланишга ҳаракат қилмоқда.

• 70'

  Жуниорнинг узатмасидан кейин Гутиерес тўпга ета олмади. Буну олдинга чиқиб, тўпни ушлаб олди.

• 69'

  "Иштаҳаси очилган" мезбонлар босим уюштиришда давом этмоқда. Гол уларга кўпроқ керак.

• 67'
  

  ГООООООООООООЛ! Ҳозиргина майдонга тушган Асенсио ҳисобни тенглаштирди!

  Крооснинг узатмасидан кейин қулай имконият ҳосил қилган Марко яқин бурчакни ишғол этди.

• 66'
  

  Модрич ва Марсело ўрнига Асенсио ҳамда Гутиерез ўйинга қўшилди.

• 65'

  Мадридликлар чиройли комбинация уюштирди ва уни яқин масофадан дарвозага аниқ зарба бера олмаган Винисиус барбод қилди. Тўп устундан майдон ташқарисига чиқиб кетди.

• 64'

  Тезкор қарши ҳужумга ўтаётган Окампосни Каземиро тўхтатиб қолди.

• 63'

  Жарима майдони марказига етказиб берилган тўпни Куртуа ушлаб олди.

• 62'

  Андалусияликлар қарши ҳужум ташкил қилди ва у Ракитичнинг ноаниқ зарбаси билан якунланди.

• 61'

  Бу сафар Каземиронинг уриниши хавфли тус олди. Аммо зарба ноаниқ кетди.

• 59'

  Начо олис масофадан ўз омадини синаб кўрди. Тўп кўзланган нуқтага бормади.

• 58'
  

  Майдон эгалари навбатдаги бурчак зарбасидан наф чиқара олмади.

• 57'

  Кроос стандарт вазиятдан жарима майдонига пас амалга оширди. Буну муштлари билан тўпни узоқлаштирди.

• 56'
  

  Алехандро Гомес ўз ўрнини Юссуф Эн-Несирига бўшатиб берди.

• 56'
  

  Винисиусга нисбатан қоида бузган Сусога сариқ карточка кўрсатилди.

• 55'

  Мадридликларнинг ҳужумлари анча узоқ вақт давомида ташкил этилмоқда. Рақиб қарши ҳужумларда анча хавфли.

• 53'

  Жарима майдони ичида тўп "Севилья" ҳимоячисининг қўлига тегиб кетди. Ҳакам ВАРга қулоқ солмоқда.

• 52'
  

  Лука Модричнинг жарима майдони ташқарисидан берган зарбасидан кейин Буну тўпни қайтарди.

• 50'

  Мадридликлар рақиб жарима майдонига кира олмаяпти. Лопетеги шогирдлари анча тартибли ҳимояланмоқда.

• 48'

  Жамоадоши узатган тўпга Алехандро Гомес ета олмади.

• 46'

  Бўлимни яна меҳмонлар фаол бошлади. Акуньянинг хавфли чиққан зарбаси устун ёнгинасидан ўтиб кетди.

• 46'
  

  Иккинчи тайм бошланди!

• 46'

  Футболчилар майдонга қайтди. Биз ҳам қайтамиз!

• 45'
  

  Биринчи таймга вақт қўшилмади. Танаффус!

• 44'

  Жарима майдони марказига оширилган тўпни Кунде дарвозага йўллади. Куртуа тўпни ушлаб олди.

• 43'

  Бурчакка яқин ҳудудда Марсело Навасга нисбатан қоида бузди. Меҳмонларда стандарт вазият юзага келди.

• 41'

  Каземиронинг жарима майдони ташқарисидан йўллаган зарбасига аниқлик етишмади.

• 39'

  Модрич ва Одриосола ўзаро бир-бирини тушунмай ҳаракат қилди. Натижада, тўп йўқотилди.

• 37'

  Тўп назорат яна андалусияликлар қўлига ўтиб кетди. "Реал" прессингда ҳаракат қиляпти.

• 35'

  Бенземанинг узатмаси ўхшамади. Олдинга чиққан дарвозабон хавфни бартараф этди.

• 34'

  Қанотдар етказиб берилган тўпни "Севилья" дарвозабони эгаллаб олди.

• 32'
  

  Карим Бенземанинг зарбаси хавфли чиқди. Буну вазият қаҳрамони.

• 30'

  Назорат Зидан шогирдлар томонга ўтди. Бироқ голдан дарак йўқ.

• 29'

  Жарима майдонига ёриб кирган Винисиуснинг зарбаси ноаниқ кетди.

• 27'

  "Реал" штурм уюштирмоқда. Рақиб катта қийинчилик билан ҳимояланяпти.

• 26'
  

  Бу сафар Винисиуснинг зарбасидан кейин тўпни дарвозабон эгаллаб олди.

• 25'
  

  Каземиронинг жарима майдони чизиғи яқинидан берган зарбасини Буну ушлаб олди.

• 25'
  

  Майдон эгалари бурчак зарбасидан наф чиқара олмади.

• 24'

  Гол ўтказиб юборган "қаймоқранглилар" дарҳол олдинга интилмоқда.

• 22'
  

  ГОООООООООООООЛ! Меҳмонлар ҳисобни очди!

  Жарима майдони ичидаги палапартишликдан унумли фойдаланган Фернандо ҳисобни очди.

• 21'
  

  Фернандонинг оёғини босиб олган Каземиро огоҳлантирилди.

• 19'

  Сусонинг олис масофадан берган зарбасига аниқлик етишмади.

• 18'

  Рақибининг шаштини сўндириш мақсадида меҳмонлар тўпни ўзларида ушлаб турибди.

• 16'

  Тўпни ўзидан бироз узоқлаштириб юборган Одриосола охир-оқибат унга ета олмади.

• 15'

  Мадридликлар фаоллашиб қолди. Бензема бу сафар жарима майдонига пас берди. Винисиус тўпни қабул қила олмади.

• 13'
  

  ЙЎҚ! Видеотакрорлардаги ёрдамчиларига қулоқ солган ҳакам голни бекор қилди. Бенземага тўпни узатган Одиросола офсйадда қолиб кетган экан.

• 12'
  

  ГООООООООООООЛ! Бензема ўз услубида!

  Жарима майдонига етказиб берилган тўпни Карим бош билан йўллаган зарбаси орқали дарвозага киритди.

• 10'

  Лопотеги шогирдлари рақиб жарима майдони атрофида қисқа узатмалар билан қулай фурсат пойламоқда.

• 8'

  Тўпни тўхтата олмаган Бензема жамоасининг тезкор қарши ҳужумини барбод қилди.

• 7'

  "Севилья" футболчилари бир неча дақиқадан бери тўпни рақибга бермаяпти. Ёмон бўлмаган старт.

• 5'

  Ҳозирча назорат андалусияликлар томонда бўлиб турибди.

• 3'

  Тезликда рақиб жарима майдонига ёриб кирган Винисиус йиқилиб тушди. Ҳаммаси жойида, ўйинни давом эттириш мумкин.

• 2'

  Илк дақиқалардан меҳмонлар босим уюштирмоқда.

• 1'
  

  Учрашувга старт берилди!

• 0'

  Футболчилар майдонга тушиб келди. Бугун Ла Лига чемпионлиги катта эҳтимол билан ҳал бўлади!