“Реал” 10 та футболчисини сотиши мумкин, улар орасида Винисиус ҳам бор

"Бенфика" бош мураббийи Жозе Моуриньо Мадриднинг "Реал" клубига тайинланишига яқин, "қаймоқранглилар"нинг янги тарихидаги энг кенг кўламли таркиб ўзгаришларидан бирини тайёрламоқда. Клуб жамоани португалиялик мутахассиснинг тактик концепциясига мослаштириш мақсадида 10 нафаргача футболчини сотиши мумкин. Асосий эътибор обрў ёки ўтмишдаги ютуқларга эмас, балки интизом ва психологик барқарорликка қаратилади. Бу ҳақда Marca хабар берди.

Манба маълумотига кўра, Моуриньо таркибни қайта тузганда Винисиус Жуниор каби машҳур футболчилар ҳам жамоани тарк этиши мумкин. Агар мураббий қайтиб келса, ҳеч бир футболчининг ўрни кафолатланмаган.

Винисиусдан ташқари, "Реал"даги келажаги шубҳа остида қолган футболчилар орасида Эдуардо Камавинга, Даниэл Себальос, Ферлан Менди, Андрей Лунин ва Гонсало Гарсия ҳам бор. Шунингдек, португалиялик мутахассис Федерико Вальверде ва Орельен Тчуаменининг келажаги ҳақида ҳам қарор қабул қилиши мумкин.

Бу ўзгаришлар шуни кўрсатадики, Моуриньо кучлироқ ҳимоя интизоми ва тактик жиҳатдан ишончли футболчиларга устунлик беради. Эҳтимол, "Реал" янада тартибли жамоага айланиши мумкин.