“Real” Angliya futboli kashfiyotini olib ketadi

“Real” klubi “Manchester Yunayted”ning 19 yoshli yarim himoyachisi Kobbi Maynuga jiddiy qiziqish bildirmoqda. Bu futbolchi yaqinda klub bilan yangi shartnoma tuzishdan bosh tortgan edi.

Defensa Central nashrining ma’lum qilishicha, madridliklar Maynuni Angliya chempionatining eng yorqin iste’dodi, deb e’tirof etmoqda. Bu o‘yinchini “Real” bosh skauti Yuni Kalafatning shaxsan o‘zi kuzatib boryapti.

Manchesterliklar klubda qolishni istamayotgan Maynuni sotib yuborishga tayyor. Klub uni 70 million funtga baholayapti.

Maynuning amaldagi shartnomasi yana ikki yil davom etishi belgilangan. Joriy mavsumda u 25 ta uchrashuvda maydonga tushib, bittadan gol va assist qayd etdi.