“Реал” “Барса” амалга оширган трансферларни таҳлил қилди, аммо...

"Реал" "Барселона"нинг ёзда амалга оширган трансферларини таҳлил қилди, деб хабар беради “Marca” нашри.

Мадрид гранди раҳбарияти таҳлиллари натижаси шу бўлди: "қисқа муддатли ва шубҳали".

“Қаймоқранглилар” Ла Лигадаги асосий рақиби амалга оширган харидлар 100 фоиз натижа кўрсатишига ишонч билдирмаган. Аксинча, ортиқча футболчилар борлиги клуб ички муҳитини бузиши мумкин деган қарорга келган. “Реал” эса мавсум давомида шундай муаммога дуч келмаслиги учун кераксиз ўйинчиларни сотишга кўпроқ эътибор қаратишмоқда.

"Барса" ҳозиргача Роберт Левандовски (45 миллион евро + қўшимчалар), Рафинья (58 миллион евро + қўшимчалар), Франк Кесси ва Андреас Кристенсен (иккаласи ҳам бепул) билан шартнома имзолаганини эълон қилди. Каталонияликлар бу билан тўхтаб қолмаслиги ҳамда яқин вақт ичида яна янги харидларни амалга ошириши кутилмоқда.

Маълумот ўрнида, “Реал” трансфер бозорида унчалик фаол эмас. “Қаймоқранглилар” Антонио Рюдигер (бепул) ва Орельен Чуамени (80 миллион евро + бонуслар) каби футболчиларни ўз сафига қўшиб олди.