"Реал" Бензема ўрнига дунёнинг энг қиммат футболчисини олиб келмоқчи

Мадриднинг "Реал" клуби ҳужум чизиғини маҳоратли футболчи билан кучайтиришни мақсад қилган.

Маълум бўлишича, "қаймоқранглилар" "Пари Сен-Жермен" вакили Килиан Мбаппени ўз таркибига қўшиб олмоқчи. У ёши тобора ўтиб, кўп жароҳат ола бошлаган ҳамюрти Карим Бенземага муносиб ўринбосар бўлиши кутиляпти.

24 ёшли Мбаппе ўтган мавсумда "қироллик клуби" сафига ўтишни истамаганди. Шундан сўнг футболчи учун жамоа эшиклари бутунлай ёпилгани тахмин қилинганди. Бироқ ҳозир вазият ўзгарган.

Килиан Қатар яшил майдонларида бўлиб ўтган Жаҳон чемпионати тўпурарига бериладиган совринни қўлга киритганди. Шунингдек, у "Transfermarkt" талқини бўйича дунёнинг энг қиммат футболчиси ҳисобланади - 180 миллион евро.