“Реал” бешта голдан кейин хато қилганини тушуниб етди

ESPN нашри журналистлари хабарига кўра, Мадриднинг “Реал” клуби мутасаддилари бразилиялик Эндрикни келаси мавсумданоқ жамоа асосий таркибига жалб қилишни режалаштирмоқда.

Мавсум бошидан бери етарли даражада ўйин амалиётига эга бўлмаган 19 ёшли легионер январь ойида Франция чемпионати иштирокчиси “Лион” жамоасига ижарага жўнатилган эди.

Эндрик янги жамоаси сафида дастлабки бешта учрашувда бешта гол уриб, битта голли пас узатди. Ёш ҳужумчининг самарали ўйини “Реал” раҳбариятини беэътибор қолдирмади.

“Лион” ёрқин истеъдодга эга ўйинчининг ижара шартномасини узайтириш истагида. Бироқ мадридликлар Франция клуби билан ҳамкорликни узайтирмасликка қарор қилган.  Манбага кўра, янги ижара варианти умуман кўриб чиқилмайди.

Бразилиялик футболчи Франция клубидан қандай таклифлар бўлишидан қатъи назар жорий чемпионат якунланиши билан Испанияга қайтади. “Реал” ўйинчи бўйича ҳар қандай таклифга рад жавобини беради.