"Реал" бир вақтнинг ўзида икки футболчидан қутулишга қарор қилди

Мадриднинг «Реал» клуби ёзги трансфер ойнасида чап қанот ҳимоячилари Фран Гарсия ва Ферлан Менди билан хайрлашишни режалаштирмоқда, деб хабар бермоқда АS нашри. 

Испания нашри маълумотича, жамоанинг янги бош мураббийи Жозе Моуриньо таркибда Марк Кукурельяни кўришни истаяпти. Шу боис клуб раҳбарияти ҳимоянинг чап флангида унга йўл очиш учун таркибни қайта шакллантиришга тайёр.

Хабарга кўра, Фран Гарсияга трансфер бозорида талаб юқори ва унинг сотилиши «Реал»га тахминан 15 миллион евро олиб келиши мумкин. Ферлан Мендига келсак, унинг кетиши жиддий жароҳати туфайли қийинлашмоқда — француз ҳимоячи операциядан сўнг тикланиш жараёнида ва камида ноябргача майдонга қайтмаслиги кутилмоқда.

Манбага кўра, клуб маошлар юкини камайтириш учун турли вариантларни кўриб чиқмоқда. Жумладан, Менди билан шартномани муддатидан олдин бекор қилиш эҳтимоли ҳам бор. Бунда аввал бельгиялик ярим ҳимоячи Эден Азар билан қўлланилган схема такрорланиши мумкин.

Шу билан бирга, яна бир чап қанот ҳимоячиси — Альваро Каррераснинг келажаги ҳам ҳали аниқ эмас. AS маълумотича, унга Лондоннинг «Челси» клуби қизиқиш билдирмоқда.

Эслатиб ўтамиз, аввалроқ шу ёзда «Реал» таркибига Марк Кукурелья, Иброҳим Конате, Дензел Думфрис ва Бернарду Силва қўшилгани ҳақида хабар берилган эди.