"Реал" футболчиси: "Месси тўп билан бўлганда, тилим айланмай қолади"

Мадриднинг "Реал" клуби 18 ёшли аргентиналик ярим ҳимоячиси Франко Мастантуоно "Интер Майами" ва Аргентина терма жамоаси ҳужумчиси Лионель Месси ҳақида фикр билдирди.

"Мен дунёнинг энг буюк клуби "Реал" мухлисиман, аммо мен учун энг яхши футболчи ҳар доим Месси бўлган ва шундай бўлиб қолади. У билан терма жамоада ўйнашга тўғри келди. Ажойиб ўйинчи. Ҳар сафар тўпга текканида, тилим айланмай қолади. Ҳатто у билан кўпдан бери ўйнаётганлар ҳам ҳайратланишни тўхтатишмайди. Мен Леодан ўрганишга ҳаракат қиламан ва унга кўрсатган ёрдами учун жуда миннатдорман", - деб Мастантуононинг сўзларини келтирди Football Espania.

Ҳужумчи 2003-2021 йилларда "Барселона" сафида тўп сурган. Бу вақт ичида Месси 778 та ўйинда майдонга тушиб, 672 та гол урди ва 303 та голли узатмани амалга оширди. Футболчи 10 марта Испания чемпиони бўлган, 7 марта Испания кубогини қўлга киритган ва 4 марта Чемпионлар лигасида зафар қучган.

Жорий мавсумда футболчи МЛС чемпионатида клуб сафида 31 та ўйинда майдонга тушиб, 34 та гол урди ва 17 та голли узатмани амалга оширди.