“Real” Gvardiolani xavotirga solib qo‘ydi

“Manchester Siti” bosh murabbiyi Xosep Gvardiola jamoadagi eng ishongan futbolchilaridan biri Rodrini qo‘ldan chiqarishi mumkinligidan xavotirda.

Rodri jamoada muhim figura. Shu bois, klub uning shartnomasini yana ikki mavsumga, ya’ni 2029 yilning 30 iyunigacha uzaytirmoqchi.

Agar ispan futbolchisi klub taklifini qabul qilsa, Evropada eng katta maosh oladigan yarim himoyachiga aylanadi. Ammo “shaharliklar”ning bu urinishlari Rodrining jamoada qolishini kafolatlamaydi.

“Oltin to‘p”ning amaldagi sohibini “Real” o‘z safiga chorlayapti. “Qirollik klubi” xo‘jayini Florentino Peres zarurat tug‘ilsa, Rodri bilan shaxsan o‘zi muzokara olib borishini ta’kidladi.

“Real”ning qiziqishi fonida Rodri “Manchester Siti” taklifini hali qabul qilgani yo‘q. Ekspertlar 29 yoshli yarim himoyachi hali kelajagi borasida yakuniy to‘xtamga kelmaganini ta’kidlayapti.

Madridliklar bosh murabbiyi Xabi Alonso ayni paytda jahon futbolida Rodri darajasidagi boshqa yarim himoyachi yo‘qligini alohida e’tirof etdi.