"Real" "Oltin to‘p" sohibiga ultimatum qo‘ydi

Yarim himoyachi Luka Modrichning "Real" bilan amaldagi shartnomasi mavsum oxirida yakuniga etadi. Madridliklar 37 yoshli futbolchiga yangi mehnat shartnomasini taklif qilishga tayyor.

Biroq "qaymoqranglilar" futbolchiga shart qo‘ydi - Modrich shu yilning iyun oyida Millatlar ligasidan keyin Xorvatiya termasidagi faoliyatini yakunlashi kerak. Shundagina futbolchi Madridda qolishi mumkin. Bu haqda "Sportske News" nashri xabar berdi.

Avvalroq matbuotda Luka Modrich Xorvatiya terma jamoasida "Evro-2024"da o‘ynashni rejalashtirayotgani haqida xabarlar tarqalgandi.

Ma’lumot uchun, 2018 yilgi "Oltin to‘p" sohibi joriy mavsum "qirollik klubi" safida 19 ta o‘yin o‘tkazib, 3 ta gol va 2 ta golli uzatmani amalga oshirdi.