"Реал" президентлигига номзод Пересни кескин танқид қилди

"Реал" президентлигига номзод Энрике Рикельме клуб раҳбари Флорентино Пересни молиявий хавфлар ва банкир Анас Лаграри билан боғлиқ фаолияти учун танқид қилди.

Рикельменинг таъкидлашича, клубнинг молиявий ҳолати сўнгги йилларда жиддий ўзгарган ва бу борада мухлислар ҳамда клуб аъзоларига етарлича маълумот берилмаган.

"Бугун биз клубнинг шаффофлиги туфайли эмас, балки журналистлар орқали “Реал” қисқа вақт ичида 770 миллион евродан ортиқ ликвид маблағларни деярли сарфлаб бўлганини билдик. Пул захиралари 99 фоизга қисқарган, эркин маблағлар эса бир неча миллион евро даражасида қолган.

“Сантьяго Бернабеу” реконструкцияси ва бошқа молиявий операциялар билан боғлиқ қарзлар мисли кўрилмаган даражага етди. Айрим таҳлилчилар вазият тез орада ўзгармаса, клубнинг молиявий барқарорлиги хавф остида қолиши мумкинлигидан огоҳлантирмоқда", — деди Рикельме.

Шунингдек, у Анас Лаграрининг клуб ишларидаги таъсири ҳақида ҳам фикр билдирди.

"Атиги икки ҳафта аввал кўплаб мадридлик мухлислар Анас Лаграри ким эканини ҳам билмасди. Турли ОАВ материаллари орқали клуб аъзолари Переснинг “Реал” бўйича режалари ва Лаграрининг таъсири ҳақида маълумотга эга бўлди", — деди президентликка номзод.

Маълумот учун, Анас Лаграри Европа Суперлигаси лойиҳасини илгари сурган A22 компаниясининг асосчиларидан бири ҳисобланади ҳамда Флорентино Переснинг яқин маслаҳатчиларидан бири сифатида тилга олинади.