“Реал” тўрт футболчига чиқиш эшикларини кўрсатди

“Реал” мутасаддилари ёзги трансферлар вақтида бош мураббий Карло Анчелотти талабига жавоб бера олмаётган бир неча футболчи билан хайрлашиш йўлларини қидирмоқда.

 Marca нашрининг хабар беришича, биринчи бўлиб клубни тарк этиши керак бўлган ижрочилар рўйхатига Эден Азар, Хесус Вальехо ва Альваро Одриосола киритилган.

Шунингдек, бир неча мавсумдан бери асосий таркибга кира олмаётган Мариано Диас ҳам ўйин амалиётига эга бўлиш учун жамоасини алмаштиришига тўғри келади.

Манбанинг таъкидлашича, юқорида номи келтирилган тўрт нафар футболчидан фақат Альваро Одриосола ўзи бўлаётган таклифларни ўрганиб чиқишга тайёр. Испания чемпионатида энг кўп маош олаётган Эден Азар кетишдан бош тортмоқда.

Вальехо ва Диас ҳам жамоада қолиб, асосий таркибга кириш учун курашни давом эттиришга тайёрлигини таъкидлаяпти.