“Реал” ва “Сити” нишонига тушган юлдуз чемпион жамоага шарт қўя бошлади

Англиянинг амалдаги чемпиони “Ливерпуль” ярим ҳимоячиси Доминик Собослаи ўзига икки гранд – “Манчестер Сити” ва “Реал” жиддий қизиқаётганидан хабар топганидан кейин мерсисайдликларга босим ўтказа бошлади.

Венгриялик футболчи бу қизиқишлар фонида “Ливерпуль”дан маошини камида икки баравар оширишни талаб қилмоқда.

Венгриянинг Blikk нашри ёзишича, ҳозирда 25 ёшли футболчи ҳафтасига тахминан 120-150 минг фунт маош олади, бироқ Доминик бу суммани тахминан 300 минг фунтгача оширишни истаяпти.

“Ливерпуль” жамоа етакчиларидан бирига айланган Собослаини таркибда ушлаб қолмоқчи ва ўйинчининг агентлари билан музокаралар давом этмоқда.

Собослаи ўтган йили жамоага қўшилган, ҳафтасига 200 минг ва 280 минг фунт маош олаётган Флориан Вирц ҳамда Александер Исакдан кўра яхшироқ ўйнаганини таъкидлаб, ўзини маош оширилишига лойиқ, деб ҳисоблайди.

Шунингдек, венгриялик футболчи “Ливерпуль”да энг кўп маош олувчи ўйинчилар – Муҳаммад Салоҳ ва Виржил ван Дейк даражасига яқинлашишни хоҳлайди. Салоҳ бир ҳафтада тахминан 400 минг фунт, ван Дейк эса 350 минг фунт топади.

Доминик Собослаининг “Ливерпуль” билан шартномаси 2028 йилнин ёзигача амал қилади, шу боис ҳозирча клубда уни зудлик билан узайтириш зарурати йўқ. Шунга қарамай, футболчига “Реал” ва “Манчестер Сити” қизиқаётгани музокаралар жараёнини тезлаштиришга туртки бўлмоқда.