"Реал" Винисиусни қандай рағбатлантирмоқчи?

"Реал" Мадрид клуби ўзининг ҳужумкор ярим ҳимоячиси Винисиус Жуниор билан амалдаги шартномани узайтирмоқчи.

Marca нашри тарқатган хабарга қараганда, яқин орада “қироллик клуби” ва бразилиялик футболчи музокаралар столига ўтиради. Томонлар фантастик шартнома масаласини муҳокама қилиши айтилмоқда.

Сўнгги пайтларда Винисиус жуда ҳам ишончли ўйин намойиш этмоқда ва бунинг ортидан унинг трансфер нархи ҳам кескин ошмоқда. Клуб раҳбарияти эса футболчининг маошини ҳам ўсиб бораётган трансфер нархига монанд равишда оширмоқчи. Айни пайтда Винисиуснинг "Реал"даги йиллик маоши 3.5 миллион еврони ташкил этади ва у жамоанинг энг кам маош олувчи футболчиларидан бири ҳисобланади.

Винисиус Жуниор жорий мавсум “Реал” сафида 14 та ўйинда майдонга тушди ва ўз ҳисобига 9 та гол ҳамда 3 та голли узатма ёздириб қўйди.