“Реал” янги футболчига ҳар мавсум учун 10 миллион евро тўлайдиган бўлди

Мадриднинг “Реал” клуби “Ливерпуль”ни тарк этган марказий ҳимоячи Иброҳим Конатени ҳамкорликка кўндирган ва ўзаро шартномани имзолашга яқин турибди.

Бу ҳақда журналист Николо Скира хабар берди.

Манба маълумотига кўра, 27 ёшли футболчи 2031 йилгача мўлжалланган меҳнат шартномасига имзо чекади.

Битимга кўра, Конатенинг йиллик маоши 10 миллион еврони ташкил қилади.

AS нашрининг таъкидлашича, шартнома “4+1” тизими асосида тузилади – тўрт йиллик асосий келишув ва яна бир йиллик узайтириш имконияти бўлади.

31 май куни “Ливерпуль” клуби Конате билан ҳамкорлик тўхтатилганини расман эълон қилган эди. Ҳимоячи 2021 йил ёзидан буён мерсисайдликлар сафида ўйнаб келган.

Transfermarkt маълумотига кўра, футболчининг бозор қиймати 50 миллион еврони ташкил этади.