“Реал” янги мавсум олдидан жиддий муаммога дуч келиши мумкин

Янги мавсумдан эътиборан Ла Лигада иштирок этадиган “Вальядолид" клуби "Реал" ҳужумчиси Мариано Диасни ўз сафига қўшиб олиши мумкин.

28 ёшли ҳужумчи 2018 йилда “қаймоқранглилар” сафига кўчиб ўтган, бироқ шу кунгача жамоанинг асосий таркиб футболчисига айлана олмади. У узоқ вақтдан бери Карим Бенземага ўринбосар сифатида ҳаракат қилиб келмоқда.

Аммо янги мавсум олдидан "Реал" захира ҳужумчиларисиз қолиши мумкин. “Defensa Central” нашри хабарига кўра, Лука Йович "Фиорентина"га ўтди, Борха Майорал "Хетафе" билан шартнома имзолашга яқин турибди. Энди эса Мариано Диас "Вальядолид" сафига кўчиб ўтиши мумкин.

Ла Лиганинг янги иштирокчиси бўлган клуб Испания чемпионатида юқори ўринларни эгаллашни мақсад қилган ва шу боис, ёзда таркибини кучайтириш ҳақида ўйламоқда.

Диас ўтган мавсумда Ла Лига доирасидаги 9 та ўйинда майдонга тушиб, битта гол ва битта голли узатма муаллифига айланган.