"Реал"даги реал муаммолар: Перес Рамосга қарши

Испаниянинг As нашри ЕЧЛ 1/8 финал босқичи доирасида "Аякс"га қарши кечган жавоб учрашуви (1:4)дан сўнг "Реал" ечиниш хонасида келишмовчиликлар келиб чиққанини маълум қилди.

Ўйин якунлангач дисквалификация боис ушбу беллашувни ўтказиб юбориб, уни мухлислар қаторида кўрган Серхио Рамос жамоа ечиниш хонасига боради. Бу орада клуб президенти Флорентино Перес аллақачон мазкур хонага етиб келган бўлган.

Президент футболчилар жуда ҳам кўп дам олиб, ўз устида ишламай қўйганини айтиб, буни шармандалик деб атайди. Унга эса жамоа сардори Серхио Рамос жавоб қайтариб, бундай ёмон  натижада у ва бутун бошли раҳбарият айбдор эканлигини айтади.

Сўнг Перес Рамосга қарата: "Сен бўшсан", -  деб айтади. Футболчи "Менга пулни бер, кетаман", -  дейди ва қуйидагиларни қўшимча қилади: "Мен бу жамоа учун боримни бердим, бу ранг учун ва ҳаттоки сен учун жанг қилдим".

Испаниянинг бошқа бир нашри Marca эса мазкур келишмовчилик тафсилотларини батафсил келтириб ўтди. Рамос ёзда  Пересга ҳужумчи олиш кераклиги борасида маслаҳат берганини эслатиб ўтган. Ушбу жанжалга клуб шифокорлари ҳам гувоҳ бўлишган.

Шундан сўнг Перес зудлик билан директорлар кенгаши чақирган. Мазкур учрашувнинг асосий мавзуси Сантьяго Соларининг истеъфоси ва унинг ўрнига Жозе Моуриньонинг олиб келиниши бўлган. Илгарироқ, Моуриньонинг Мадридга қайтишидаги асосий тўсиқ айнан Рамос эканлиги айтилган эди. Португалиялик мутахассис ҳимоячи билан яхши муносабатларга эга эмас.

Тунгги соат иккига қадар давом этган мажлисда томонлар бир қарорга кела олмайди ва Соларининг истеъфоси рад этилади. Бугун кундузи эса мадридликлар Моуриньонинг агенти Жорже Мендеш билан музокараларни бошлаганлиги борасида хабарлар  тарқалди. "Қироллик клуби" ушбу келишувни "Вальядолид"га қарши ўйинга қадар амалга ошириш ниятида, аммо Жозе бунга ҳозирча рози бўлгани йўқ.

Клуб эса юзага келган ҳолат юзасидан бирорта расмий хабар бергани йўқ.

Агарда вазият юмшамаса, Перес Рамосни сардорлик боғичидан маҳрум этиши ва якунда Серхио жамоани тарк этиши ҳам мумкин. 

Ёдингизда  бўлса 2003 йил "Реал" Фернандо Йерро билан янги шартнома борасида келишиб олган эди, аммо Пересга қария футболчининг реклама тадбирларидан бирида ўзини тутиши ёқмайди ва шартнома тузиш режаси барбод бўлади. Рауль ва Икер Касильясларнинг ҳам кетар чоғида Перес билан муносабатлари ёмонлашган эди.

Don Balon нашри эса президент ва сардор ўртасидаги келишмовчилик "Барселона"дан учралган мағлубиятдан сўнг бошлангани ҳақида ёзмоқда. Ўшанда "Реал"нинг ёшлар жамоаси устози Альваро Бенито маҳаллий радиостанцияларнинг бирига берган интервьюсида Каземиро ва Кроосларни кескин танқид қилган эди. Натижада мутахассис ишдан олинган. Бу эса бир қатор испаниялик футболчиларнинг норозилигига сабаб бўлган, жумладан Рамоснинг ҳам.

Умуман олганда "бланкослар" айни вақтда жуда  оғир вазиятга тушиб қолишган. Клуб бир ҳафта ичида ютиш учун потенциал имконияти бўлган учта мусобақани тарк этди. Келишмовчиликлар эса раҳбариятга хам кўчган. Қолаверса, жамоада юзага келган вазият дарҳол ОАВга чиқиб кетиши, аниқроғи "уйдаги гапнинг кўчага чиқиб кетиши" эса вазиятнинг янада чигаллашишига олиб келмоқда.