"Реал"га Бензема ўрнига супертўпурар келади!

“Челси” ҳужумчиси Ромелу Лукаку ёзги трансферлар вақтида “Реал”га кўчиб ўтиши кутилмоқда.

Defensa Central нашрининг хабар беришича, мадридликлар жароҳатларга мойил бўлиб қолган Эрлинг Холанд ўрнига жисмонан бақувват Ромелу Лукакуни трансфер қилишни мўлжалламоқда. Келажакда Ромелу ҳозирги тўпурар Карим Бензема ўрнини босиши керак бўлади. 

Манбанинг таъкидлашича, “Челси”да ишлари юришмаган бельгиялик тўпурарнинг ўзи ҳам Чемпионлар лигаси финалига йўлланма олган “Қироллик клуби”га кўчиб ўтиш истагини билдиряпти.

“Аристократлар” бош мураббий Томас Тухель талаби билан Лукакуни олиш учун “Интер”га 97,5 миллион фунт тўлаган эди. Рекорд трансфер эгасига айланган Ромелу Лондонга келганидан кейин германиялик мутахассиснинг тактикасига умуман тушмади. У бош мураббий талабига қарамай, ўйин услубини ўзгартиргани йўқ.

Бу мавсум 23 та учрашувда бешта гол урган Лукакунинг трансфери 85 миллион еврога баҳоланмоқда. Унинг амалдаги шартномаси 2026 йилгача давом этади.