“Реал”нинг Қитъалараро кубок финалидаги рақиби аниқланди

Қитъалараро кубок мусобақасининг плей-офф босқичи якунланиб, финалда “Реал”га қарши ўйнайдиган жамоа номи маълум бўлди.

Плей-оффнинг сўнгги учрашувида Мексиканинг “Пачука” жамоаси Мисрнинг “Ал-Аҳли” клуби вакилларини ортда қолдирди. Беллашувда ҳисоб очилмади. Ғолибни аниқлаш учун ўтказилган пенальтилар сериясида мексикаликларнинг 6:5 ҳисобида қўли баланд келди.

“Пачука” бу босқичга чиқиш йўлида Бразилиянинг “Ботафого” жамоасини 3:0 ҳисобида мағлуб этганди. “Ал-Аҳли” эса, Осиё вакили – Бирлашган Араб Амирликларининг “Ал-Айн” жамоаси дарвозасига жавобсиз учта тўп киритганди.

Энди “Реал” ва “Пачука” ўртасидаги Қитъалараро кубок финали 18 декабрь куни Қатарда ўтказилади.