"Реал"нинг соядаги қаҳрамони! Барча омадли трансферлар асосчиси саналган Юни Калафат ҳақида эшитганмисиз?

Уни бугунги "Реал"нинг бош архитектори, кўринмас одам ва музокаралар даҳоси деб аташади. Айнан Юни Калафат "Реал"нинг бошқа клублар билан солиштиргандаги асосий козер қартаси саналади. Молиявий томондан жуда бақувват бўлган бошқа жамоалар уддалай олмаган ишларни айнан бугунги мақоланинг бош қаҳрамони Мадрид клубига осонлик билан тақдим этиб келмоқда.

Бугунги янги "Реал"нинг асосини ташкил қилган футболчиларнинг барчасини жамоага ўтишга айнан Калафат кўндирган, десак ишонасизми? Винисиус, Вальверде, Беллингем, Арда Гулер, Родриго, Тчуамени, Рюдигер, Каземиро...

Деярли интервью бермаслиги, ОАВ назарида бўлмасликка интилгани учун у ҳақида эшитмаган бўлишингиз мумкин. Бу мақолада "Реал"нинг бошқа грандлардан ажралиб туришини бир неча йиллардан бери таъминлаб келаётган ўз ишининг устаси ҳақида сўз боради.

Юни Калафат  бугунги "қаймоқранглилар" бошқарувидаги энг катта уч шахсдан бири. Жамоа раҳбари - Флорентино Перес, Хосе Анхел Санчес билан бир мақомда тилга олинадиган қаҳрамонимиз клубнинг халқаро бўлим раҳбари саналади. Шунингдек, жамоанинг бош скаути ҳамдир.

Испанияда туғилди, Бразилияда яшади, журналист бўлиб ишлади...

Калафат Мадрид шаҳрида дунёга келган бўлсада, болалиги Бразилияда ўтган. Айнан шу фактор эвазига унинг эътиборини кўпроқ жанубий-америкалик футболчилар тортар?! Айнан шу сабабли у португал тилида жуда яхши сўзлаша олади. Қаҳрамонимиз олийгоҳни тугатгач, бразилиялик спортчилар билан алоқалар ўрнатишга эътибор қаратишни бошлади. Қаҳрамонимиз журналистика соҳасидаги ишларини ҳам муносиб давом эттирди. Айниқса, "Фибре Малдини" кўрсатувидаги аналитик чиқишлари ёрдамида Бразилиядаги энг машҳур футбол журналистига айланди.
Унинг "Реал" билан йўллари кесишишига асосий сабабчи Неймар десам ҳайрон бўлманг. Ней "Сантос"да "ёндиришни" бошлаган пайтлариёқ "Барселона" сингари "Реал Мадрид" ҳам иқтидорни қўлга киритиш илинжида эди. Флорентино Перес вазият кескинлашаётганини кўргач, Бразилиядаги футболчиларга таъсир кўрсата оладиган шахс сифатида ном қозонган Юни Калафатни йўллайди. 2012 йилда Юни Неймар билан учрашганида, аллақачон ҳужумчи Каталония клуби билан келишув имзолаб бўлган эди.

Айнан ўша воқеадан сўнг Флорентино Перес иқтидорли скаутга шарт қўйди: "Энди бўлажак юлдузларни қўлдан чиқаришга ҳаққимиз йўқ! Бор эътиборимизни бўлажак "Олтин тўп" эгаларига қаратамиз".

Неймар учун 3 йил давомида аёвсиз кураш олиб борсада, якунда азалий рақибига имкониятни бой берган Перес "Янги Неймарлар" учун курашларда аламли мағлубиятга учрамаслик учун ҳам Калафат билан ҳамкорликни давом эттиришга қарор қилади. Натижада, Юни бор эътиборини Бразилиядаги иқтидорли, аммо ҳали тўлиқ кашф этилмаган футболчиларга қаратади. Бразилия бозори футбол учун энг кўп даромад олиб келадиган макон ҳисобланади. Ёш иқтидорларни бепул қўйиб юборишдан хавотирга тушган клублар арзимаган пулларга бўлажак юлдузларни қўйиб юборишга тайёр. "Реал"нинг янги скаути айнан Жанубий Америка бозорига кўпроқ эътибор қаратишни бошлади.

Калафат йиллаб музокаралар ўтказади. Родриго учун 4 йил сарфлаган бўлса, Винисиусни...

Қаҳрамонимизнинг биринчи танлови Каземиро бўлиб, "қаймоқранглилар" ярим ҳимоячи учун "Сан Пауло"га 6 миллион евро тўлаган, холос. 2022 йилда уни "Манчестер Юнайтед"га 70 миллион евро эвазига қўйиб юборишгани кўпчиликнинг ёдидан кўтарилмагани аниқ. 2014 йилда Калафат 15 ёшли Родригони излаб топади. Бир неча йил давомида тўхтовсиз олиб борилган музокаралар сабабли Родриго якунда "қироллик клуби" фойдасига танлов қилади. "Реал" "Сантос"га ҳали ҳеч ким танимайдиган ўсмир болакай учун 45 миллион евро сарфлаганида, кўплаб испан нашрлари буни ақлсизлик, деб атаган эди. Бугун Родриго янги "Реал"нинг асосий фигураларидан бири бўлибгина қолмай," Трансфермаркт" портали томонидан 100 миллион еврога баҳоланган кам сонли футболчилардан бири саналади.

Калафатнинг музокаралардаги асосий устунлиги футболчилар билан биргаликда, унинг оила аъзолари ва дўстлари билан ҳам яхши муносабатда бўлиши. Айнан уларнинг ёрдамида ёш футболчилар янги иқлим, янги мамлакат ва катта босимга дош бериши мумкин. 18-19 ёшли йигитлар Европага кўчиб ўтганида, жуда кўплаб муаммоларга дуч келиши табиий. Айниқса, жуда қашшоқ оилада катта бўлган ёш футболчиларни атрофидаги барча хорижга кетаётган футболчининг фонида катта суммадаги пулларни кўради. Табиийки, барчаси бу пулларнинг бир қисмини ўзиники қилиш учун айёрликларга қўл уради. Калафат бу борадаги барча нозик масалаларни яхши тушунади. Бразилияда катта бўлгани сабабли, доим керакли сўзлар билан футболчини оиласи билан биргаликда бир қарорга келишида ёрдам беради.

Эътиборли томони шундаки, сўнгги йилларда қаҳрамонимиз "Реал" сафига олиб келган 14 футболчининг 10 таси аллақачон супер юлдузга айланиб бўлди. Қаҳрамонимиз асосан Жанубий Америка бозорини "контрол қилсада", Арда Гулер, Орельен Тчуамени, Жуд Беллингем, Такефусо Кубо сингари номларни ҳам учратишингиз мумкин. Перес агар жамоа таркибида кўришни истаган футболчи билан бошқа жамоалар ҳам қизиқиб қолса, ишга Калафатни қўшади. У" музокаралар қироли" бўлгани учун ҳам ҳозирга қадар рақобатлашган футболчиларининг барчасини "Реал"га ўтишга кўндирган. Федерико Вальверде Юни ҳақида билдирган фикри, қаҳрамонимизнинг ўз ишини қай даражада профессионал бажаришига мисол бўлади:

"Юни Калафат ҳаётимни ўзгартириб юборди. Гап фақат футболда эмас. У менга ўсмирлик чоғимдан бери ғамхўрлик қилиб келади. Испанияга кўчиб келганимдан сўнг деярли ҳар куни қўнғироқ қилар, аҳволим билан қизиқар эди. Оила аъзоларим ҳам кўчиб келгач, уларга ҳам адаптация масаласида жуда кўп ёрдам берган. Мен доим ундан миннатдорман".

Калафат амалга оширган яна бир катта трансфер ҳақида алоҳида тўхталмасликнинг имкони йўқ. Винисиус Бразилияда кўзга ташланишни бошлаган пайтлари, биринчилардан бўлиб "Барселона" эътиборига тушади. "Янги Неймар" бўлиши тахмин қилинган йигитни қўйиб юбормаслик учун Юни футболчи билан учрашиш учун Бразилияга келади. Қаҳрамонимиз бошқа агентлар сингари футболчи билан ёлғиз кўришиш ўрнига, уларни кечки овқатга оилавий таклиф этади. Суҳбат давомида қаҳрамонимиз "Барселона"дан кўра "Реал"нинг Вини учун фойдали танлов бўлишини аниқ-тиниқ тушунтириб беради. Футбол аналитиги бўлгани боис ҳатто бўлажак юлдузнинг ўйин услуби ва клубларнинг техникаси юқори ўйинчиларга бўлган эҳтиёжи борасида ҳам тушунтириш ишларини олиб боради.

Натижада, Винисиус ва унинг оила аъзолари "Реал" инфраструктураси билан танишиш мақсадида Мадридга ташриф буюришга рози бўлади. Бундан бир неча ой аввал худди шундай ташриф билан Каталонияда бўлган футболчи ва оила аъзолари яна Испанияга учиб келади.

Уларни аэропортда кутиб олган Юни Калафат муаммоли вазиятга дуч келади. Винисиуснинг онасини жомадони самолёт бортига ортилмаган экан. Бироз ноқулай аҳволда қолган оилани дарров Юни Мадриддаги энг зўр универмагга олиб боради. Ўз ҳисобидан Винининг онасига янги кийимлар совға қилади, Мадридни ўзи айлантиради. Шу билан биргаликда, қайта қурилаётган "Реал"да футболчи учун катта умид боғланганини тушунтириб беради. Айнан шу сафар чоғидаги кўрсатилган эътибор сабабли якунда бразилиялик вингер "Барса" таклифини рад этиб, "Реал" билан шартнома имзолайди.

"Менда бир нечта вариантлар бор эди. Оилам билан биргаликда уларни кўриб чиқишни бошлаган эдик. "Реал" мен учун кўп нарса қилди. Айнан уларнинг илиқ қарши олиши сабабли Мадрид клуби билан яқинликни ҳис қилдим", - деб ўз трансфери ҳақида фикр билдиради Винисиус. Бразилиялик футболчи Мадридга кўчиб ўтгач, Калафат унга ҳисобчи ва яшаш учун жой масаласида кўмаклашади. Унинг тил билан муаммосини ҳал этиш мақсадида хатто испан тилидан дарс ўтувчи ўқитувчиларни ҳам бириктиради.

Бундан икки йил аввал Жуд Беллингемнинг трансфери бироз чўзилаётганини сезган Перес яна ўзининг асосий козер қартасини ўйинга қўшади. "Манчестер Сити", ПСЖ сингари грандлар улкан маошларни ваъда қилаётган бир пайтда, Юни биргина жумла билан Жудни якуний қарорига таъсир кўрсатган:

"Биз яхши футболчиларни бир жойга жамламоқчи эмасмиз. Шунчаки, чемпионларни етиштирамиз!"

Айнан шу сўзлардан сўнг, Жуд шартномага қўл қўяди. Ўзининг биринчи пресс-конференциясида инглиз футболчиси Юнига ташаккур билдириб ўтгани сўзимизга исбот бўлади.

Сўнгги 10 йил давомида қаҳрамонимиз футбол грандлари эътиборига тушди. Унда ҳозирнинг ўзидаёқ бир нечта ТОП клублардан келган миллион-миллион маош кўрсатилган таклифлар келиб тушмоқда. Калафакт эса барчасига рад жавобини берганча, "Реал"да бахтли эканлигини таъкидламоқда.