Рэшфорд Роналдунинг натижасини такрорлади

АПЛнинг 20-тури доирасида "Манчестер дербиси" бўлиб ўтди ва унда тен Хаг шогирдлари 2:1 ҳисобида ғалаба қозонди. "Қизил иблислар" футболчиси Маркус Рэшфорд ўйинда ғалаба тўпини киритди.

Шу тариқа, 25 ёшли ҳужумчи 2008 йилнинг март ва апрель ойларида барча мусобақаларда "Манчестер Юнайтед" сафида кетма-кет 7 та баҳсда гол урган Криштиану Роналдунинг натижасини такрорлади. Криштиану ҳам, Рэшфорд ҳам ушбу босқичда 8 тадан гол уришган.

Решфорднинг премьер-лигадаги 67 та голидан 27 таси ғалаба голлари ва бу киритган тўпларининг 40,3 фоизидир. Мазкур натижа 50 тадан кўп дарвозани ишғол қилганлар орасида турнир тарихидаги энг яхши кўрсаткичдир.