"Рома" ва "Ювентус" футболчи алмашиши мумкин

“Ювентус” ҳамон “Рома” ярим ҳимоячиси Николо Заньолони сотиб олишга ҳаракат қилмоқда.

“Tuttosport” нашри хабарига кўра, "Рома" 22 ёшли италиялик учун 50 миллион евро талаб қилмоқда. Аммо, туринликлар футболчи учун бунча сумма тўлашга тайёр эмас. Шу боис, “кекса синьора” трансферга ярим ҳимоячи Артурни киритиши мумкин. Олдинроқ, Жозе Моуриньо Бразилия терма жамоаси хавбекини Рим клубига олиб келмоқчи эди.

Шунингдек, "Милан" ҳам Заньолога даъвогарлик қилмоқда. "Рома"нинг ўзи ярим ҳимоячини сотишни истамаяпти, бироқ клуб Никола билан 2024 йилнинг июнида якунига етадиган шартномасини узайтириш борасида келишувга эриша олмади. Шу сабаб, уни сотиш варинатини кўриб чиқиши мумкин.

Аввалроқ, “Ювентус” Заньолонинг агенти билан уч марта учрашгани ҳақида хабар берилганди. Заньоло ўтган мавсумда "Рома" сафида барча турнирларда 42 ўйинда 8 гол ва 9 ассист муаллифига айланди.