“Рома” яқин вақт ичида Дибала трансферини эълон қилади

Журналист Николо Скиранинг хабарига кўра, "Рома" тез орада ҳужумчи Пауло Дибала билан шартнома имзолаганини эълон қилади.

Манбага кўра, яқин соатларда бу ҳақда расмий хабар берилиши кутилмоқда. 28 ёшли аргентиналик футболчи ва римликлар ўртасидаги келишув яна бир йилга узайтириш имконияти билан 2025 йилнинг июнь ойи охиригача амал қилади. Пауло йилига 4,5 миллион евро маош ва яна 1,5 миллион еврони бонус кўриншида олади.

Шартномада 20 миллион евро миқдоридаги товон пули кўзда тутилган. Форвард 21-рақам остида тўп тепади.

Дибала 1 июлдан буён эркин агент ҳисоблананади. Аргентиналикнинг собиқ клуби “Ювентус” бўлиб, туринликлар сафига 2015 йилда қўшилган. Ўтган мавсумда футболчи “кекса синьора”нинг барча турнирлар доирасидаги 39 та ўйинда майдонга тушиб, ўз ҳисобига 15 та гол ва 6 та голли узатмани амалга оширган.