Роналду бир зарба билан тарихий рекордни синдирди

“Ан-Наср” ҳужумчиси Криштиану Роналду янги мавсумдаги биринчи голи билан тарихий рекордни янгилади.

Саудияликлар клублар ўртасида Араб мамлакатлари чемпионлари кубоги мусобақасининг гуруҳ босқичида Туниснинг “Монастир” жамоасини 4:1 ҳисобида мағлубиятга учратди.

“Ан-Наср”нинг иккинчи тўпини португалиялик футболчи киритди. Шу тариқа, Роналду расмий учрашувларда боши билан урган голлари сонини 145 тага етказиб, мултақ рекорд соҳибига айланди.

Аввалги рекорд Германиянинг афсонавий ҳужумчиси Герд Мюллерга тегишли бўлиб, у фаолияти давомида рақиблар дарвозасини боши билан 144 маротаба ишғол қилган эди. Бу борада учинчи кўрсаткич испаниялик ҳужумчи Карлос Сантильянага тегишли. У жами голларидан 135 тасини боши билан киритган.