Роналду биттада учта совринга эга чиқди

Португалия терма жамоаси ва “Ан-Наср” ҳужумчиси Криштиану Роналду Саудия Арабистони Профессионал лигасининг 2024-2025 йилги мавсуми якунлари бўйича учта индивидуал совринни қўлга киритди.

Роналду мухлислар талқинига кўра, Саудия Арабистони чемпионатининг энг яхши футболчиси, деб топилди. Мавсум давомида машҳур тўпурар 15 маротаба учрашувнинг энг зўр ўйинчиси совринига сазовор бўлган.

Чемпионатда 30 баҳсда рақиблар дарвозасини 25 маротаба ишғол қилган Роналду Про-лига  тўпурарлари пойгасида ҳам ғолиб чиқди.

Бундан ташқари, 40 ёшли юлдузнинг “Ар-Риёд” дарвозасига киритган тўпи мавсумнинг энг чиройли голи сифатида Роналдуга учинчи совринни келтирди.   

Эслатиб ўтамиз, Криштиану Роналду ўтган ой “Ан-Наср” билан ҳамкорлигини яна икки йил давом эттиришга розилик бериб, риёдликлар билан янги битим имзолаган эди.