Роналду Мадридда! У "Реал" базасида машғулот ўтказмоқда

"Манчестер Юнайтед" билан шартномасини бекор қилган Криштиану Роналду фаолиятини қайси клубда давом эттириши сўроқ остида турибди.

"Релево" нашри тарқатган хабарга кўра, португалиялик футболчи айни пайтда Мадридда бўлиб турибди. У "Реал"га тегишли Вальдебебасдаги базада машғулот ўтказмоқда. Таъкидлаш жоиз, "қаймоқранглилар" ҳам айнан шу ерда шуғулланади.

Қайд этилишича, "қироллик клуби" раҳбарияти ўз афсонасига вақтинча машғулот ўташга рухсат берган. Унинг шу ерда эканлигидан фойдаланиб, академия футболчилари учун Криштиану билан учрашув ташкил этилди.

Аввалроқ, Роналду бир оёғи билан "Ал-Насср"да эканлиги ҳақида хабар бергандик. Саудияликлар шарафини ҳимоя қилаётган легионеримиз Жалолиддин Машарипов ўзи ўйнаётган 7-рақамни унга бериб, 77-рақамни олган.