Роналду Месси билан рақобат тугаганини эълон қилди

“Ан-Наср” шарафини ҳимоя қилаётган Криштиану Роналду “Интер Майами” ҳужумчиси Лионель Месси билан узоқ йиллик рақобат якунланганини билдирди.

38 ёшли ҳужумчига унинг мухлислари аргентиналик юлдузни ёмон кўришини айтишди. Роналду бунга муносабат билдирди.

- Тарафдорларим Мессини ёмон кўришига асос йўқ, чунки ўртадаги рақобат якунланган. Бу рақобат мухлисларга ёқарди. Кимга Роналду ёқса, у Мессини ёмон кўриши шарт эмас. Чунки бу икки футболчи ҳам зўр, улар футбол тарихини ўзгартира олган. Энг муҳими, бизни бутун дунёда ҳурмат қилишади, - деди Криштиану Роналду.

Роналдунинг айтишича, улар 15 йил давомида саҳнани бўлишиб келишган, гарчи яқин дўст бўлмаса-да, улар бир бирини ҳамкасб сифатида ҳурмат қилади.