Роналду оламшумул рекордни қайд этди

“Ан-Наср” ва Португалия терма жамоаси ҳужумчиси Криштиану Роналду тарихий рекорд қайд этди. Статистика порталларининг маълум қилишича, 39 ёшли юлдузнинг ижтимоий тармоқлардаги обуначилари сони 1 миллиардга етди.

Криштиану бу кўрсаткичга эришган дунёдаги ягона одам.

Жаҳон футболининг энг яхши тўпурари ижтимоий тармоқлардаги оммавийлигини қуйидагича изоҳлади.

- Биз 1 миллиард обуначи билан янги тарих яратдик. Бу фақатгина рақамлар эмас, балки футболга бўлган умумий иштиёқимиз, майдондан ташқарида ҳам ушбу ўйинни яхши кўришимиз ифодасидир.

Менга бўлган ишончингиз, мени қўллаб-қувватлаб турганингиз, ҳаётимнинг бир бўлагига айланганингиздан миннатдорман, - деб ёзди Роналду ўз саҳифасида обуначиларга.

Беш карра “Олтин тўп” соҳиби Роналду футболчилик фаолияти давомида “Спортинг”, “Манчестер Юнайтед”, “Реал”, “Ювентус” ва “Ан-Наср” жамоаларида тўп тепган.