Роналду ўзи билан ўйнаган юлдузни Мессининг ёнига боришига тўсқинлик қиляпти

Саудия Арабистонининг “Ан-Наср” клуби ҳужумчиси Криштиану Роналду ўзи билан икки жамоа – “Реал” ва “Манчестер Юнтайед”да ўйнаган бразилиялик Каземиронинг Лионель Месси ўйнаётган “Интер Майами”га ўтишига йўл қўймоқчи эмас.

Сўнгги маълумотларга қараганда, Каземиро мавсум охирида Манчестерни тарк этиши аниқ бўлганидан кейин уни эркин агент мақомида қўлга киритмоқчи бўлган жамоалар сафи кенгайиб бормоқда.

Хусусан, Лионель Месси етакчилигидаги “Интер Майами” ҳам тажрибали ярим ҳимоячини ўз сафига қўшиб олиш учун амалий ҳаракатларни бошлаб юборган.

33 ёшли футболчига Европа ва Саудия Арабистонидан ҳам чорловлар бор. Хабар қилинишича, Криштиану Роналдунинг шахсан ўзи Каземирони Саудиядаги лойиҳасига қўшилишга кўндиришга ҳаракат қилмоқда.

Португалиялик футболчи Каземирони “Ан-Наср”ни сезиларли даражада кучайтира оладиган муҳим фигура, деб ҳисоблайди.

Шу билан бирга, АҚШда бразилиялик футболчи Месси ўйнаётган “Интер Майами”га ўтишига ишонишмоқда.

Дэвид Бекхэм клуби Каземирони 2026 йилги жаҳон чемпионатидан кейин майдон марказида Серхио Бускетс ўрнига потенциал ўринбосар сифатида кўрмоқда.

Шунингдек, MLS варианти бўйича музокаралар анча илгарилаб кетгани, футболчининг ўзи эса яқинда Майамига бориб, клуб инфратузилмаси билан танишгани ва раҳбарият билан учрашгани айтилади.

Агар трансфер АҚШ клубига амалга ошса, футбол олами сўнгги йиллардаги энг кутилмаган ҳамкорликлардан бирига гувоҳ бўлиши мумкин — “Реал”нинг собиқ етакчиси Лионель Месси билан бир жамоада ўйнайди.