“Ювентус” ҳужумчиси Криштиану Роналду ёзда клубни тарк этиши ростга ўхшайди. Туринликлар Европа Чемпионлар лигасида кетма-кет иккинчи марта муваффақиятсизликка учраганидан кейин, клуб раҳбарияти хизматлари анча қимматга тушаётган Роналдуни сотиб юборишга қарор қилгани ҳақида хабарлар тарқалганди.

Шундан сўнг, португалиялик юлдузни ўз таркибига қўшиб олишни истаган жамоалар ҳаракатга тушиб қолди. Даъвогар орасида “Интер Майами”,  “Спортинг”, “Реал” каби клублар номи айтилди.

Сўнгги маълумотларга қараганда, Криштианунинг ўзига “Реал”га қайтиш варианти маъқул келаётган экан. Чунки машҳур тўпурар фаолиятини якунлашдан олдин яна бир бор Европа Чемпионлар лигаси совринини қўлга киритишни режалаштирган. У бу мақсадига “Реал” билан бирга эришиш осонроқ, деб ҳисобламоқда.

Криштиану Роналду “Ювентус”дан олдин “Реал”да тўққиз йил тўп тепган ва жами 450 та гол уриб, клуб  тарихидаги энг зўр тўпурар ҳисобланади.