Роналду такрорланмас рекордини янгилаб қўйди

Португалия терма жамоаси ва “Ан-Наср” ҳужумчиси Криштиану Роналду Саудия Арабистони Профессионал лигасида навбатдаги голини урди.

Пойтахтликлар чемпионатнинг бешинчи турида Макка шаҳрининг “Ал-Ваҳда” жамоаси билан куч синашиб, 2:0 ҳисобида зафар қучди.

“Ан-Наср”нинг иккинчи голини 39 ёшли португалиялик тўпурар пенальтидан урди. Бу Роналдунинг профессионал фаолиятидаги 903-гол сифатида қайд этилди.

Криштиану жаҳон футболида расмий учрашувларда энг кўп тўп киритган ўйинчи ҳисобланади. Бундан буёғига унинг ҳар бир голи янги рекорд сифатида қайд этилаверади.

Криштиану Роналду “Спортинг”да бешта, “Манчестер Юнайтед”да 145 та, “Реал”да 450 та, “Ювентус”да 101 та гол урган. “Ан-Наср”га келганидан бери рақиблар дарвозасини 70 марта ишғол қилди.

Бундан ташқари, унинг ҳисобда Португалия терма жамоасидаги 132 та гол ҳам бор.

Роналду жаҳоннинг, терма жамоаларнинг, Европа чемпионатларининг, Европа Чемпионлар лигасининг ва клублар ўртасидаги жаҳон чемпионатининг энг яхши тўпурари ҳисобланади.