Криштиану Роналду “Лион”га қарши ўтказилган учрашувда рақиб дарвозасига иккита тўп киритиб, Чемпионлар лигасида урган голлари сонини 130 тага етказиб олди. Шу тариқа, “Ювентус” ҳужумчиси бу маррани забт этган биринчи футболчига айланди.

Чемпионлар лигасининг энг зўр тўпурари номинациясида португалиялик ҳужумчи билан рақобатлашаётган Лионель Месси бу маррага етиши учун бироз тер тўкиши керак бўлади. “Барселона” етакчиси Европанинг энг зўр турнирида 114 та гол урган.

Бу борада кучли учликни фаолиятини анча олдин тугатган Рауль Гонсалес якунлаган. “Реал” ва “Шальке”нинг собиқ ҳужумчиси ҳисобида 71 та гол бор. Фаолиятини давом эттираётган форвардлар орасида эса Карим Бензема 65-голини урди ва яқин йилларда Раулдан ўзиб кетиши мумкин бўлса-да, Роналду ҳамда Мессига ета олмаслиги кундек равшан.