Роналдуни Италияга жўнатишмоқчи

Криштиану Роналдунинг агенти Жорже Мендеш португалиялик тўпурарни Чемпионлар лигасида қатнашадиган жамоага жойлаш фикридан қайтгани йўқ.

Мендеш Роналдуга жой очиш учун “Наполи” ва “Милан” клубларига ҳужумчиларини сотиб юборишга кўмаклашадиган бўлди.

“Наполи” нигериялик ҳужумчи Виктор Осимхенни қимматроқ нархга сотмоқчи. Агар Мендеш 23 ёшли форвардга янги жамоа топиб берса, Роналду Неаполга йўл олиши мумкин.

Шунингдек, “Милан” ҳужумчиси Рафаэль Леаунинг бозори қайнаяпти. Мендеш миланликларни португалиялик футболчини сотиб юборишга кўндириб, ўрнига Криштиануни олиб келишни режалаштирган. Жорже Мендеш бунгача ўз мижозининг хизматларини “Челси”, “Марсель” ва “Спортинг” жамоаларига таклиф қилганди.