Роналдунинг устози ишдан олинди

Саудия Арабистони Суперкубоги учун ўтказилган учрашувда “Ан-Наср” футболчилари “Ал-Ҳилол”дан 1:4 ҳисобида қақшатқич мағлубиятга учради.

Аслида ўйин “Ан-Наср” учун муваффақиятли бошланган бўлиб, Криштиану Роналду биринчи бўлим охирида ҳисобни очган эди.

Бироқ беллашувнинг иккинчи ярмида”Ал-Ҳилол”га Европа лигаларидан олиб келинган чарм тўп усталари – Сергей Милинкович-Савич ва Мальком биттадан, Александр Митрович иккита гол уриб, Роналдуни яна совринсиз қолдирди.

Бу мағлубиятдан кейин “Ан-Наср” раҳбарияти бош мураббий Луиш Каштруни ишдан ҳайдади, деб хабар тарқатди Alyaum нашри.

 Луиш Каштру жамоани 2023 йили қабул қилиб олганди ва унинг клуб билан яна бир йиллик шартномаси бор эди.

Сўнгги маълумотларга қараганда, “Ан-Наср” клуби директорлар кенгаши раиси Иброҳим Ал-Мухаддиб янги бош мураббий масаласи билан шахсан шуғулланмоқда.