Россиялик боксчи "Қизил китоб"га киритилган орангутанга сигарет бергани учун жиддий танқидга учради!

Россиялик боксчи Анастасия Лучкина "Тайган" ҳайвонот боғида электрон сигарет чекаётгани, шунингдек орангутанга бир неча сигарет узатганини ижтимоий тармоқларга жойлаган эди.

Бугун ушбу видео катта танқидларга сабаб бўлди. 

"SHOT" телеграм канали маълумотларига кўра, айни пайтда орангутаннинг аҳволи ёмонлашган, яъни иштаҳани йўқотган, одамлар билан мулоқот қилишдан бош тортмоқда ва кун бўйи бир жойда ётибди.

Тахмин қилинишича, орангутан таркибида 2,5-3 мл суюқлик бўлган электрон сигарет картриджини ютиб юборган, бу ошқозонга кирса, оғир интоксикацияга олиб келиши мумкин. Мутахассислар текширувни давом эттиряпти.

Лучкинанинг мураббийи Владимир Акатов мазкур воқеага қуйидагича изох берди:

"Анастасиянинг чекишини билмас эдим. У ҳозир таътилда. Қайтгач, албатта, буни муҳокама қиламиз!"

Маълумот учун, Санкт-Петербургдан олиб келинган "Дана" лақабли ушбу орангутан Қрим ҳайвонот боғида 2018 йилдан бери яшайди. "Қизил китоб"га киритилган бу маймун тури  бутун Қримдаги ягона орангутан ҳисобланади.