Россиянинг энг муҳим дербисида Ўрунов “яширин қурол”ми?

Бугун Россия премьер лигасининг 7-турида пойтахт дербиси – ЦСКА ва “Спартак” учрашуви бўлиб ўтади.

Ҳар икки жамоа ҳам жорий мавсумда ўз олдига юксак мақсадларни қўйгани ҳеч кимга сир эмас. “Армиячилар” яна пешқадамлар сафига қўшилиш учун ушбу баҳсда ўз мухлислари кўз ўнгида “спартакчилар”ни тиз чўктириши лозим. Шунда ҳам,  ЦСКА мусобақа жадвалида бугунги рақибдан бир очко ортда қолган бўлади.

Кўплаб мухлис мутахассислар ЦСКАнинг мавсумлар оралиғидаги трансфер сиёсати муваффақиятли бўлганига эътибор қаратяпти. Бу клуб тўрт нафар легионер – Аргентинанинг “Сан-Лоренсо” клубидан ҳужумчи Адольфо Гайч, Нидерландия чемпионатида “Херенвен” шарафини ҳимоя қилган нигериялик форвард Чидера Эджуке, Бразилиянинг “Интернасьонал” жамоаси ҳимоячиси Бруно Фукс ва “Ростов”да ўзини кўрсатган қозоғистонлик ярим ҳимоячи Бахтиёр Зайнутдиновни олди.

Булардан ташқари ҳам, мезбонлар таркибида Игорь Акинфеев, Марио Фернандес, Георгий Шенников, Никола Влашич, Алан Дзагоев, Арнор Сигурдсон, Фёдор Чалов каби номдор ўйинчилар кўп.

Россия чемпионати таҳлилчилари “Спартак” янги мавсумда ўтган йили еттинчи ўринни эгаллаб, Еврокубоклардан қуруқ қолган таркибни ўзгартирмай ўйнатаётганини танқид қилаётган эди. Ҳатто, кутилган натижага эриша олмаган ёш мураббий  Доменико Тедесконинг келажаги сўроқ остида қолган вазиятлар ҳам бўлди.

Мавсумлар оралиғида “Спартак” қамалиб чиққан Александр Кокоринни ва коронавирусга чалинган Остон Ўруновни трансфер қилди. Кокорин илк машғулотларда жароҳат олиб сафдан чиқди. Ўрунов олтинчи турга келиб, 20-25 дақиқа ўйнади. Лекин дебютдаёқ ишончни оқлади.

Шунга қарамай, Тедеско ўтган йилги таркиб билан мусобақа жадвалида биринчи ўринга кўтарилди. “Спартак” мутасаддилари ва мухлислари бу кунни уч йилдан кўпроқ кутганди. “Спартак”нинг трансфер сиёсати ҳам бошқаларникидан кескин фарқ қилади. Ҳамма таркибни кучайтиришга эътибор қаратаётган бир пайтда бош директор Шамиль Газизов футболчиларни бошқа жамоаларга пуллаш устида иш олиб бормоқда. Хусусан, жамоада етакчилик қилиш учун олиб келинган Гус Тиль “Фрайбург”га ижарага берилди. Педро Роша (“Фламенго”), Георгий Мелкадзе (“Ахмат”), Александр Ломовицкий (“Химки”), Артем Тимофеев (“Ахмат”) мавсумни бошқа жамоада ўтказади.

Айни пайтда “Спартак”нинг ишонган ўйинчиларидан - Самюэль Жигога "Лион", Эсекиэль Понсега "Болонья", Александр Кокоринга "Рома"дан жиддий таклифлар бўлмоқда. Шунингдек, Россиянинг қатор клублари ҳам айрим футболчилар ижараси бўйича клубга мурожаат қилган.

Шундай бўлса-да, “Спартак” раҳбарияти бу мавсум чемпионлик ва Чемпионлар лигаси йўлланмаси учун курашиш асосий мақсад эканини бир неча маротаба таъкидлади.

Бугун ЦСКА билан бўладиган учрашув олдидан таҳлил ва тахминларни илгари сураётган мутахассислар “Спартак”нинг асосий таркиби кетма-кет икки мавсум давомида деярли ўзгармаганини ва уларнинг ўйин услуби рақибларга яхши таниш эканига урғу қаратмоқда. Бу вазиятда жароҳатидан қутилган Александр Кокорин ва дебют ўйинида мураббийлар ишончини оқлаган Остон Ўрунов “спартакчилар” учун ҳақиқий “яширин қурол” бўлиши кутилмоқда.

Дарҳақиқат, ЦСКА жамоаси ҳам янги мавсум олдидан Остон Ўруновга харидор бўлган эди. Бу клуб ўзбекистонлик легионер учун “Уфа”га икки миллион евро таклиф қилган. Бироқ, Остоннинг “Спартак” жамоасига қўшилишида уни Россияга таклиф этган Шамиль Газизовнинг хизмати катта бўлди.

ЦСКА – “Спартак” учрашуви Тошкент вақти билан 21:00 да бошланади.

Ўруновдан гол кутишяпти!

Ўрунов дербига тайёрми? (янги фотолар)

Ўрунов, ўйнасанг Рой Кин ёки Гаттузодек ўйна!

“Спартак” бир неча футболчидан қутилмоқчи. Ўрунов нима қилади?

“Спартак”нинг энг қиммат футболчиси кетишига Ўрунов сабабчими?

Шомуродов, Жалолиддинов ва Ўруновга Европа эшиги очиладими?