Ro‘ziqul Berdiev: "Chempionlik poygasida oxirigacha qatnasha olmaganimizning bir qancha sabablari bor..."

O‘zbekiston Superligasi 26-turidan o‘rin olgan OKMK - "Nasaf" bahsi bo‘lib o‘tdi. Unda tomonlar 1:1 hisobida durang o‘ynadi. 

Uchrashuvdan so‘ng tashkil etilgan matbuot anjumanida "ajdarlar" bosh murabbiyi Ro‘ziqul Berdiev o‘z fikrlari bilan o‘rtoqlashdi. 

"Xayrli kech, hammaga. Bugungi o‘yin jangovor tarzda o‘tdi. Ikki xamoa ham g‘alaba uchun maydonga tushdi. OKMK ham, biz ham 3 ochkoga loyiq uchrashuv namoyish etdik. Bizda ham ko‘p vaziyatlar bo‘ldi.

Vodiydagi derbida ham durang natija qayd etilibdi. Kumush medal uchun munosib edik, deb o‘ylayman. Bugun ham natija uchun harakat qilgandik. Ammo qiyin bo‘lishi aniq edi.

Ko‘p bahslarda rotatsiya qilishga majburmiz. Sababi, oldinda bizni muhim bellashuv kutmoqda. Shunday ekan, tarkibda yo‘qotish bo‘lmasligi uchun asosiy tarkibda o‘zgarishlar qilib turishimiz lozim. Asosan markaz va hujum chizig‘ida rotatsiya qilamiz. Chunki shu pozitsiyalarda o‘zgarish qilishga imkonimiz bor.

Vitse-chempionlik, ikkita kubok qo‘lga kiritilishi - "Nasaf" tarixida hali sodir bo‘lmagan. Buni takrorlash ham qiyin bo‘ladi. Shu tufayli, men ishonch bilan ayta olamanki, bu mavsum biz uchun eng yaxshisi bo‘ldi.

Chempionlik poygasida oxirigacha qatnasha olmaganimizning bir qancha sabablari bor. Birinchidan, ayrim muhim o‘yinchilarimizni yo‘qotdik. Yana ba’zi legionerlar transferida omadsizlikka uchradik. Qolaversa, barqarorlik, mahorat etishmasligi kabi holatlar ham maksimal ijobiy natija qayd etilmaganiga sabab bo‘ldi.

Joriy mavsum "Nasaf"ga 5 ballik sistemada 5 baho qo‘ya olaman. Negaligini yuqorida aytib o‘tdim", - dedi mutaxassis.