Рўзиқул Бердиев: "Ҳозирча унда дадаси даражасида нимадир борлигини кўрмаяпман"

Ўзбекистон Кубоги гуруҳ босқичининг сўнгги турида “Насаф” воҳа дербисида “Машъал” майдонида ягона гол эвазига ғалаба қозонди. Натижада қаршиликлар гуруҳда 100 фоизли натижа билан кейинги босқич масаласини ҳал қилдилар. Воҳа дербисидан кейин “Насаф” устози Рўзиқул Бердиев бир қатор саволларга жавоб берди.

- Ўйинни тезлиги ва темпи у қадар юқори бўлмадию, лекин иккала жамоанинг асосий вазифаси натижа эди. Биз бунга эришдик. Ўзларинг кўрдинглар, кўп вазиятлар бўлгани йўқ. “Машъал”да пенальти бўлган ҳолат, бизда эса голга айлантирган вазиятимиз бўлди. Асосийси, ҳисобни ҳам, ўйинни ҳам назорат қилиб тургандик. Агар зарурат бўлганида биз янада қўшишимиз мумкин эди. Йигитларга кўрсатмаларимиз шундай эдики, натижа учун ўйнаш ва гуруҳдан 1-ўринни олиб кейинги босқичга чиқиш эканлигини айтгандик ва буни уддаладик.

- Хусниддин Алиқулов захирада ҳам йўқ эди. Нима учун?

- Хусниддин Алиқуловни кичик жароҳати безовта қилаётганди. Кўрдинглар, терма жамоа йиғинига ҳам чақирилмади. Бир ҳафта жароҳатини тиклаш учун керак бўлади. Шу боис “Машъал” билан учрашув қайдномасига ҳам уни киритмадик. Терма жамоадан ҳам унга даволаниши учун рухсат беришган. Яна баъзи-бир ўйинчиларимизга дам беришга ҳаракат қилдик. Масалан, Абдувоҳид Неъматов, Жавоҳир Сидиқов, кейин Манноновда озгина жароҳат бор. Шунинг учун таркибда айрим ротацияга қўл урдик.

- Ниҳоят, Дониёр Нарзуллаев жамоада кўриниш берди. Марко Станоевич ҳам клубга қайтди. Бу икки футболчининг қўшлиши жамоага нима беради ва Станоевич қачон майдонга тушиши мумкин?

- Биласизлар, иккала футболчини ҳам тажрибаси бор. Талабимизни ва кўрсатмаларимизни яхши биладиган ўйинчилардир. Жароҳатларидан тезроқ фориғ бўлиб, машғулотларни тўлиқ ўтказишса ўйинларга жалб қиламиз. Марко яқинда келиб қўшилди. Бизни қувонтиргани жароҳатидан қўрқмасдан машғулотларга киришиб кетяпти. Бу жуда яхши. Айниқса, руҳий тарафдан тайёргарлиги ажойиб эканини билдиради. Олмалиқ билан учрашувгача машғулотларда тўлиқ қатнашиб турса ўйинга жалб қилишимиз мумкин. Дониёр Нарзуллаевда ҳам шунақа ҳолат эди, операцияси бўлди. Менимча, у “Машъал” билан учрашувга яхши киришиб кетди. 10 дақиқа ўйнаган бўлса-да, жамоамизнинг ҳужумида фаол бўлди. Бу футболчиларимизнинг тажрибаси бор. Қолдирилган ўйинлар ва Кубок баҳслари билан биз кўп учрашувларни ўтказамиз. Шу боис кўпроқ ўйинчиларга эга бўлсак, бу биз учун яхши.

- Азиз Холмуродов Зафар Холмуродовни фарзанди. Унда дадаси каби голга иштиёқи, интилиши қандай?

- Ҳозирча унда дадаси даражасида нимадир борлигини кўрмаяпман. Баъзи-бир ўйинларга жалб қиламиз. Аммо ўзига ишончсиз ҳаракат қилади. Уни ўзига ҳам бу ҳақида айтдим. Аммо футболчини потенциали бор. Сизлар ҳам, мен ҳам биламизки, бош билан ўйнашда дадасига яқин ҳам келмайди.

- “Машъал” – “Насаф” учрашувидан файз қочибди, деган гаплар ҳам бўляпти. Олдин сиз ўйнаган пайт билан солиштирганда яхши ва ёмон томонга қандай ўзгаришлар бўлган?

- Ёмон томони “Машъал” жамоасини про лигада ўйнаётгани. Биз доим бу рақиб билан олий лигада учрашардик. Кескинлик жуда ююқори даражада бўларди. Ҳақиқатда уни дерби деб мақтансак бўларди. Ҳозиргисини кўрдинглар, даражаси ва тезлиги жиҳатидан дерби мақомида эмас. “Машъал”га омад тилаймиз. Суперлигага чиқиб, ўз мақсадига эришишини жуда хоҳлардик. Қашқадарёдан учта жамоа бор. Иккитаси Суперлигада бўлганида ҳам мухлислар янада кўпроқ келарди ва ўйинлар даражаси ҳам юқори кечарди.

- Ғузордаги ўйинларда кўпроқ кўриниш беряпсиз. Бу бўш вақтингиз кўплигиданми ёки “Шўртан”дан кимнидир кўз остингизга олиб қўйдингизми?

- У ерда ҳам баъзи-бир футболчиларимиз бор. Имкониятимиз тўғри келиб, вақтимиз бўлганида албатта бориб кўрамиз. Балки эътибор бермагандирсизлар, “Машъал”ни ҳам айрим ўйинларига келиб кўриб турамиз. “Шўртан”нинг охирги иккита ўйинига бордик. Масофамиз яқин, имкониятимиз бўлса албатта борамиз. Иқтидорли ёшлар бор. Иккала жамоада бизни мактабни битирган йигитлар тўп суришяпти. Фақат бу жамоаларни ўйинларига эмас, балки академиямизни ҳам каттароқ ўйинлари бўлса, кузатиб турамиз. Имкон борида бундан фойдаланамиз ва йигитларни назорат қиламиз.