Рўзиқул Бердиев "Навбаҳор"дан учралган мағлубиятга қандай изоҳ берди?

Суперлига 14-туридан ўрин олган "Насаф" - "Навбаҳор" учрашуви бўлиб ўтди. Унда наманганликлар 1:0 ҳисобида рақибдан устун келди. 

"Лочинлар" сафида ягона голни Асадбек Собиржонов киритди.

Беллашувдан сўнг ҳар иккала жамоа иштирокида матбуот анжумани ўтказилди. Қуйида "аждарлар" устози Рўзиқул Бердиевнинг фикрлари билан танишиб чиқишингиз мумкин: 

- Ўйинни ёмон бошладик. Бундан ташқари гол ҳам ўтказиб юбордик. Иккинчи бўлимда анча ташаббусга эга бўлдик. Ҳужумда ҳам ҳимояда ҳам ишончли ўйин кўрсатдик, дея оламан Шундай бўлса-да, бизда аниқ гол урадиган вазият бўлмади. Сабаби, рақиб ҳимояда яхши ўйин кўрсатди. 

- Биз иккита схемада ҳам ўйнаймиз. 3 та марказий ҳимоячи билнан ўйнашимизга тўғри келди. Бунга сабаб Шерзод Насруллаевнинг таркибимизда йўқлиги бўлди. 

- Охирида биз таваккал қилдик, лекин вазиятлар яратишда анча оқсадик. Ўзингиз амалда кўрдингиз. Йигитларга раҳмат айтаман. Улар охиригача курашди. Буларни футболчилар билан бирга муҳокама қиламиз. 

- Ҳаммаси ҳаяжон билан боғлиқ. Йигитларнинг руҳий томондан тайёргарлиги ошиб кетганлиги учун ўйинни жуда ҳам асабий тарзда ўтказдик. Жамоамизни бунақа ўйинлар учун тажрибаси етишмади ҳам, деб ўйлайман