Рўзиқул Бердиев омадли бош кийим, Лима ҳақида фикри ўзгаргани ва жамоаси билан такрорланиб келаётган камчилик ҳақида гапирди

Ўзбекистон кубоги финалидан ўрин олган "Навбаҳор" - "Насаф" ўйини якунига етди. Асосий вақт 1:1 ҳисобида якунланди. Қўшимча таймларда эса номинал меҳмонлар 2:1 ҳисобида ғалаба қозонди. 

Қарши клуби сафида голларга Акмал Мозговой ва Матеус Лима Круз муаллифлик қилди. Наманганликларнинг голи Дониёр Абдуманнопов номига қайд этилди: 

Беллашувдан сўнг ҳар икки жамоа бош мураббийлари иштирокида матбуот анжумани бўлиб ўтди. Қуйида Ўзбекистон Кубогини кетма-кет иккинчи йил ютаётган "Насаф" клубининг бош мураббийи Рўзиқул Бердиевнинг фикрлари билан танишиб чиқишингиз мумкин: 

- Ассалому алайкум. Ҳаммага хайрли кеч. Авваламбор, ташкилотчиларга миннатдорчилигимни билдириб ўтаман. "Насаф" мухлисларини бугунги тарихий ғалаба билан табриклайман. Ўйинга келадиган бўлсак, биринчи бўлимда анча мазмунли ҳамда сифатли футбол намойиш этдик. Иккинчи бўлимда чарчоқ аломатлари туфайли ўйин тизгинини бироз қўлдан чиқарганимизни тан оламан.  

- Қўшимча вақтда йигитлар қийин бўлса ҳам ўзларида куч топа олди ва рақиб дарвозасини ишғол қилишга эришдик. Ёш футболчимиз Зафармурод иккинчи голда ажойиб ҳаракат қилганини алоҳида таъкидлаб ўтиш керак. 

- Экстра таймлардаги ўзгаришлар ғалабанинг асосий омили бўлди, деб ўйлайсизми? 

Биринчи бўлимда нисбатан анча сифатли ўйнадик. Иккинчи таймда ҳисобни сақлаб қолишга уриндик. Наздимда, бу руҳий ҳолат билан боғлиқ. Бир неча баҳсдан бери бу такрорланиб келяпти. Экстра таймларда жисмоний тайёргарлик биринчи планга чиқади. Айтиш керакки, қилган иккита ўзгаришимиз бизга қўл келди. 

- Аввалги финалларда ҳам оқ рангли бош кийимда келгандингиз. Бу ҳам ғалабада қандайдир омил, деб ҳисоблайсизми? 

- Йўқ, бунга аҳамият бермайман. Илк кубокни қўлга киритганимизда ҳам оқ бош кийимда эдим. Кўпчилик буни таъкидлаяпти. Балки, омадимиз келаётгани ростдир. Ўйлайманки, кийимнинг бунда аҳамияти йўқ. Шунчаки, бу мен учун қулай ҳисобланади. 

- Лима Круз ўзини оқламаётгани ҳақида кўп гапиргансиз. Бугунги ғалабадан сўнг фикрингиз ўзгардими?

- Албатта, бугунги ғалабага асосий ҳиссани шу йигит қўшди. Бу трансфер юз фоиз ўзини оқлади. Эсингизда бўлса, мен ундан 20 та гол уришни кутмаймиз, аммо муҳим голларга муаллифлик қилишини кутамиз, дегандим. Лиманинг жисмоний ҳолатини яхшилаш ва бизни футболни тушунишига вақт керак эди. Кейинчалик, унинг жисмоний ҳолатини ҳам тўғриладик. Шунингдек, у биз ундан нима талаб қилаётганимизни ушунишни бошлади.