Рўзиқул Бердиев: "Осон рақиб эмасди, йигитларга раҳмат, аммо асосий мақсадимиз ҳали олдинда"

“Насаф” клуби Ўзбекистон Кубоги финалида “Навбаҳор”ни мағлубиятга учратиб бош совринни қўлга киритди. Учрашувдан кейиноқ “Спорт ТВ” мухбири Бердиевдан дастлабки таассуротларини сўради.

- Бугунги ғалабадан жуда хурсандмиз. Тарихий ғалаба бўлди. Фурсатдан фойдаланиб, “Насаф” клубини, мухлисларни, жамоамиз учун қайғурган барча инсонларни табриклайман. Албатта, ўйин оғир бўлди. Рақибимиз осон рақиб эмасди. Шунинг учун охиригача кескин кураш бўлди. Йигитларимга раҳмат айтмоқчиман, улар охиригача курашишди. Лекин асосий мақсадимиз ҳали олдинда, шуни ҳам давом эттирмоқчимиз.

- Ойбек Бозоров билан Шароф Муҳитдинов назаримда, бироз эртароқ алмаштирилди. Аммо Бозоров тўғри жамоадошлари ёнига кетди, Муҳитдинов эса ичкарига кириб кетди.

- Ойбекни жароҳати борлиги учун анча ўйинларни ўтказиб юборганди. Шу сабабли уни жисмоний тайёргарлиги жойида эмасди, кўпроқ хато қилди. Шарофни Шерзод Насруллаев билан алмаштириш режамизда бор эди. Нарсуллаев майдонга тушиб, ўйинга тезкорлик қўшиши керак эди. Шарофни бугунги ҳаракати нотўғри, аммо бу хиссиёт. Лекин учрашувдан кейин келиб табриклади, мени баландга отишди (кулади).

- Захирадан майдонга туширилганлар ишончингизни оқлашдими?

- Албатта, 27-рақамдаги Зафармуроднинг майдонга тушиши ва иккинчи голни айнан у яратиб берди. Иккита ўйинчидан қочиб Лимага тўпни узатиб бериши катта футболчиларга хос иш. Унга имконият беряпмиз, яхши ҳаракатлари бор, бугун ҳам ёрдам берди.

- Лима мавсум охирида бирданига очилиб қолди...

- Лима келганида жисмоний ҳолати ёмон эди. Уни жисмоний ҳолатини тўғрилашимизга тўғри келди. Охирги ўйинларда ёрдам беряпти.

- Учрашувнинг қайси палласи сиз учун оғирроқ кечди?

- Қўшимча вақтлар. Чунки бунга ўрганмаганмиз. Шу сабабли қўшимча вақтларда кўпроқ ҳимояландик. Биринчи бўлимда рақибга нисбатан анча сифатли, мазмунли ўйнадик. Аммо иккинчи бўлимда гол ўтказилган вазиятда эътиборни йўқотдик.