Рўзиқул Бердиевнинг клуб билан шартномаси тугаётгани, Бобир Абдихолиқов нега жамоани табрикламагани ва бошқалар ҳақида қаршиликлар устозининг фикрлари

Ўзбекистон кубоги финалидан сўнг, икки жамоа бош мураббийлари иштирокида матбуот анжумани ташкил этилди. Унда қаршиликлар устози Рўзиқул Бердиев ўйин борасида ўз фикрларини билдириб ўтди.

- Гапиришга ҳам куч қолмади-ку (кулади). Йил давомида катта меҳнат қилдик. Кўплаб учрашувларда майдонга тушдик. Мухлисларимиз учун қайсидир совринни ютишимиз керак эди. Бунга эришдик, жуда ҳам хурсандман. “Насаф” мухлислари Ўзбекистонда жуда ҳам кўпчиликни ташкил этади. Ушбу ғалабани уларга бағишлаймиз.

Майдонда 10 киши қолган бўлсак-да, тартибли ҳаракат қилдик. Футболчиларимда бир киши кам бўлиб қолганимизда ҳам ўзларига бўлган ишонч юқори бўлди. Бу уларнинг йил давомида қилган меҳнатлари самарасидир. “Пахтакор” нисбатан мазмунли ўйнагандир. Камчилик бўлиб қолганимиздан сўнг, қарши ҳужум ёки стандарт вазиятлардан гол киритишимиз лозим эди. Буни амалга ошира олдик.

Баъзан майдонда сон жиҳатдан устун бўлган жамоа бўш ҳаракат қилиши мумкин. Буни биз яхши билардик. Қолаверса, ярим финалда ҳам 10 киши бўлиб ғалабага эришдик. Қайсидир маънода, бу борада ўзига хос тажрибамиз бор.

Танаффусда шогирдларимга айнан Олмалиқдаги ўйинни эслатдим. “Пахтакор” ҳам иккинчи бўлимда ҳужумга берилиши натижасида чарчашини таъкидладим. Шунинг учун, бир қатор тезкор футболчиларни захирадан майдонга туширдик ва бу ўз самарасини берди, деб ўйлайман. Aсосийси, йигитлар диққатни йўқотишмади ва охиригача ҳаракат қилишди. Aйнан шунинг эвазига ғалаба қозондик.

“Насаф” жорий мавсум ўзбек клублари ичида расмий ўйинларда энг кўп майдонга тушган жамоа. Суперлига, кубок ва ОФК кубогида кўплаб учрашувлар ўтказдик. Таркибимиз у қадар чуқур захирага эга эмас. Шу боис мавсум давомидаги беллашувларда таркибда ротация амалга оширган ҳолда футболчиларга дам олиш имконини бериб бордик. Бу жуда ҳам оғир кечди. Чемпионат ўйинларида захира ўриндиғи “тор эканлиги” натижасида мавсумни 4-ўринда якунладик. Йил аввалида 4 нафар етакчи футболчимиз жамоани тарк этганди. Биз бир йил ичида янги жамоани ташкил қилиб, бир мақсад сари бирлаштира олдик.

Кўплаб футболчиларимиз билан 3-4 йиллик шартномаларимиз бор. Фақатгина ёши бироз катта футболчилар ва мураббийлар билан 1 йиллик шартнома имзоланганди. Менимча, мураббийлар билан муаммо бўлмайди ва керакли футболчиларни таркибда сақлаб қолишга ҳаракат қиламиз. Aлбатта, “Насаф” учун фойдали бўлган яхши такилфлар бўлса, кўриб чиқишимиз мумкин. Раҳбарият томонидан келгуси мавсум учун катта мақсадлар қўйилган.

Бозоров қўпол футболчилар сирасига кирмайди. Мен қизил карточка берилган вазиятни кўрмаганлигим учун ёрдамчиларимдан сўрадим. Aсосийси, ҳозир бу нарсаларни эслашга ҳожат йўқ.

Финални Бобир Абдихолиқов стадиондан кузатди ва уни кейинги мавсум жамоада кўришимиз мумкинми?Агар у финални стадиондан кузатган бўлса, нима учун бизни ғалаба билан табрикламади, шуниси қизиқ. Албатта, унинг клуб билан келажаги борасида эса балки кейинроқ гаплашармиз, - деди Рўзиқул Бердиев.