Рўзиқул Бердиевнинг Туркия сафари, олимпия терма жамоаси ва "Насаф"даги тақдири ҳақида

«Насаф» клубининг бош мураббийи Рўзиқул Бердиев яқинда Туркияда бўлиб қайтди. У ерда «Бешиктош» клубида амалиёт ўтади. Бундан ташқари, Бердиев масаласида охирги пайтлардаги миш-мишлар ҳам анча ортганди. Яъни, унинг «Насаф»ни тарк этиши ва бошқа клубда фаолиятини давом эттириши борасида гап-сўзлар тарқалди. Биз эса ушбу мақола орқали барчасига ойдинлик киритди. Аввало мураббий Туркия сафари ҳақидаги фикрлари билан бошлади.

- Биз «Про» лицензиясига ўқияпмиз. Шу боис унинг талабларидан бири албатта хориж клубларидан бирида амалиёт ўтишингиз керак, - деб гап бошлади, Бердиев. - Бизга Туркияга бориб малака ошириш имконияти бўлди. Мен, Жаъфар Ирисметов ва Жасур Абдураимов учаламиз «Бешиктош» клубида бўлдик. Клубнинг инфраструктураси билан танишдик. «Бешиктош» бош мураббийи Абдулла Авчи билан суҳбатда бўлдик. У Туркияда таниқли мураббийлардан ҳисобланади. Клубда эса бизга барча имкониятларни яратиб беришди. Клубнинг «Касимпаса» билан ўйинини стадионда кўрдик. Стадиондаги муҳит, ташкилий ишлар аъло даражада. Туркияда ҳам футболни жуда ёқтиришади. Биз эса ўйиннинг сифати ва даражасига кўпроқ эътибор қаратдик. «Бешиктош» фақат Туркияда эмас, балки Европада ҳам ўз ўрнига эга. Шунингдек, клубнинг машғулотларини ҳам кузатиб бордик. Машғулотлардаги йўналиш ўзимизникига ўхшайди. Фақат кўрсатмаларда фарқ қилиши мумкин. Уларнинг ўйиндан кейинги машғулотларини кузатдик. Тикланиш жараёни қандай, қанақа шароитда шуғулланаётгани, майдонларнинг ҳолати, ҳаммасидан ўзимиз учун керакли жиҳатларни олдик. Бош мураббийдан эса футболга ўзининг қарашлари қандай эканлиги ҳақида сўрадик. Уларда легионерларга катта эътибор беришади. Кўп жамоаларида юлдуз ўйинчилари бор, улар билан ишлаш ҳам осон эмас. Хуллас, Абдулла Авчи билан суҳбатда кўп масалаларга ойдинлик киритдик. Тўғриси, у ерда легионерга бўлган эхтиёж ҳам катта. Баъзи клубларда эса 10 га яқин легионерлар ўйнашяпти. Нега бунчалик кўп деб қизиқиб сўраганимизда, легионерларнинг кўплиги клубнинг имиджига ҳам ижобий таъсир кўрсатар экан. Айиқса, маркетинг томондан фойда олишаркан. Бундан ташқари, «Бешиктош»нинг футбол академиясига ҳам бордик. Албатта, у ерда ҳам шароитлар юқори даражада. Тўғри, бизда ҳам академиялар бор, аммо шароитлар ҳали бу даражада эмас.

Айни пайтда Ўзбекистондаги энг яхши футбол академияларидан бири «Насаф»га тегишли эканлигини барчамиз яхши биламиз. Чунки ҳар йили у ердан янгидан-янги иқтидорлар кашф қилинаётганини кўп кўрамиз. Рўзиқул Бердиев эса «Бешиктош» академиясини кўздан кечирган чоғида ўз-ўзидан «Насаф»даги академияси билан солиштириш имконияти пайдо бўлди…

- Тўғриси, уларнинг академиясини кузатган чоғимдаги ўзимиздаги академиядаги камчиликларимиз менга аён бўлди, дея – муносабат билдирди, Бердиев. – Аввало академиядаги мураббийларнинг машғулот ўтказиш жараёнига алоҳида эътибор қаратишади. Кейин ёшларнинг селекция ишлари билан шуғулланишига жиддий қарашади. У ерда ҳар бир ёшдаги болаларнинг машғулот ўтказишига қараб юкламалар тақсималанади. Яхшилаб қарасак, биздаги камчиликлар кўриниб қолар экан. Ҳар доим футболчиларнинг соғлиги текшириб туриларкан. Бундан ташқари, уларнинг еб-ичишларига ҳам катта эътибор беришади. Чунки болаларнинг нимани истеъмол қилиши ҳам муҳим масала. Академия директори билан гаплашганимизда мураббийларнинг билими ва малакаси жуда муҳим ҳисобланар экан. Биласизми, уларда бир футболчи фаолиятини тугатдими, энди у эртага ёшларга мураббийлик қилади, деган тушунча йўқ экан. Академияга таклиф қилишдан олдин мураббийлик билими ва савиясига жиддий қарашади. Ўзимизники билан таққослаганда, айрим мураббийларнинг малакаси етарли эмаслиги кўриниб қолади. Уларда ҳам ташкилий масалалар жуда юқори даражада экан. Футболчиларнинг овқатланиши, тикланиш жараёнлари, машғулот ўтказадиган жойлар, умуман ҳаммаси қаттиқ назоратга олинади. «Насаф»да машғулот ўтказиш учун яхши шароитлар бор. Лекин кўплаб жамоаларимиз бундай шароитлар етарлича эмас. Турклар эса аслида бундай жараёнлар оддий нарсалар бўлиши керак дейишади. Яъни, улар яратилган яхши шароитларга шунчаки оддий қарашади. Масалан, биз академиямиз зўр деб гапирамиз-у, бироқ аслида ҳам бундай ҳолатлар футболда оддий бўлиши керак бўлган ҳолатлар. Уларнинг базасида 4-5 та сунъий ва табиий майдонлари, спорт заллари, бассейн ва яна бошқа нарсалари бор. Улар учун эса бу оддий. Боя «Бешиктош»нинг «Касимпаса» билан ўйинини кўрганимиз ҳақида айтгандим. Ўзимизнинг футбол билан солиштирганимда балки жисмоний томондан улардан кучсизроқ бўлишимиз мумкин. Лекин техник тарафдан ўзбек футболчилари улардан юқорироқ. Шунингдек, туркияликлар легионерларнинг индивидуал маҳоратларига ҳам кўпроқ суянишади. Бундан ташқари, Туркияда маркетинг даражаси яхши йўлга қўйилган ва клублари молиявий томондан ҳам бой ҳисобланишади. Катта-катта ҳомийлари клублар ёки федерацияга яхшигина пулларни ажратишади. Телевидение ҳам жамоаларга катта маблағларни ажратишади.

Бердиев_1

Бердиев айтганидек, у «Насаф» академиясини уларники билан ўзаро таққослаб кўрди ва бу борада айрим камчиликларни ҳам пайқади. Бироқ шуни ҳам алоҳида айтиш жоизки, айни пайтда барибир «Насаф» академияси иқтидорларни кашф қилиш бўйича юртимизда етакчи ҳисобланади. Масалан, январь ойида U-23 Осиё чемпионати бўлиб ўтади ва унда Ўзбекистон олимпия терма жамоасига «Насаф»дан 10 нафар футболчилар чақирилган. Бу эса «Насаф»да ишлар тўғри йўлга қўйилганлигидан далолат.

- Академиямиз ҳақида илиқ сўзларни айтганингиз учун раҳмат. Охирги йилларда клубнинг олиб борган сиёсати туфайли биз бу борада ўсишга эришдик. Чунки ёшларга кўпроқ эътибор бериб, уларнинг ўйин амалиётига эга бўлишлари талаб қилинди. Натижада кўплаб ўйинчиларимиз кўзга кўриниб қолди. Агар имконтиятларимиз юқори бўлиб, таркибга тажрибали футболчилар ёки легионерларни олиб келганимизда ҳозирга келиб бу ёшларимиз кўзга кўринишмаган бўларди.

Бердиев ҳам олимиячиларимизни кузатиш маросимида бевосита иштирок этди. Қолаверса, таркибда кўплаб унинг шогирдлари ҳам жалб этилган. Энди барчанинг эътибори олимпия терма жамоамизга қаратилади. Бу борада эса Рўзиқул Саъдуллаевич терма жамоамизнинг имкониятлари борасида гапирди.

- Олимпия терма жамоамизга «Насаф»дан 10 нафар футболчининг чақирилгани бизни хурсанд қилади. Агар Илҳом Алижоновни қўшиб ҳисобласак, уларнинг сони 11 тани ташкил қилади. Чунки Алижонов академиямиздан чиққан ва кейин «Навбаҳор»га кетган. Умуман олганда, ўзбек футболига озгина бўлса-да, фойдамиз тегаётганидан хурсандмиз. Вакилларимизнинг Олимпиада йўлланмасини қўлга киритишларини ҳаммамиз кутиб турибмиз. Кўпчилик эса терма жамоамизни қийин гуруҳга тушиб қолганлиги ҳақида гапиришяпти. Аммо мен бундай демаган бўлардим. Чунки ҳозирги футболчиларнинг имкониятларини чамалайдиган бўлсак, биз кучли таркибга эгамиз. Эътибор берсангиз, таркибдаги барча футболчиларимиз Суперлигада ўз клубларида мунтазам равишда ўйин амалиётига эга бўлишган. Шунингдек, охирги пайтларда терма жамоамиз кучли рақиблар билан ҳам яхши ўйнашди. Мураббий сифатида мен бу терма жамоамизга жуда ишоняпман. Эрон, Жанубий Корея ёки Хитой бизнинг рақибимиз бўлса-да, лекин «ўлим гуруҳи» дейиш нотўғри. Чунки бизнинг таркибимизга қаранг, аксинча улар жамоамиздан қўрқишлари керак. Терма жамоага таклиф қилинган барча ўйинчиларнинг имкониятлари ва уларнинг нималарга қодирлигини яхши биламан. Шу боис бу термадан кўп нарсани кутса бўлади.

бердиев3_1

Ҳамма вақт Бердиев терма жамоа манфаатини клуб манфаатидан устун қўйиб келган. Мана, «Насаф»дан 10 та футболчи терма жамоа билан кетган бўлса, лекин клуб бош мураббийи сифатида бундан кўпроқ Бердиев жабр чекади. Чунки «Насаф»нинг қишки йиғини бошланди, аммо асосий таркиб мавжуд эмас. Қизиқ, Рўзиқул Саъдуллаевич бу вазиятдан қандай чиқиб кетаркин?

- Бу йил чемпионатимиз биз учун бир текисда кечмади. Лекин Ўзбекистон миллий олимпия қўмитаси томонидан бизнинг жамоамизга катта эътибор қаратилди. Мавсум давомида йигитларимга бир гапни кўп айтдим: майли, чемпионатда биз пастки ўринладан бирини эгаллармиз, бироқ олимпиада йўлланмасини қўлга киритиш вазифаси ҳар доим биринчи ўринда туради. Агар терма жамоамиз Олимпиада йўлланмасини қўлга киритадиган бўлса, бу клубимиз учун ҳам, мен учун ҳам катта ютуқ бўлади. Мавсум давомида ҳам футболчиларимизни бир неча бор ўқув йиғинларига олиб кетишди. Балки бу бошқаларга қизиқ эмасдир. Уларнинг терма жамоа йиғинидан қандай ҳолатда қайтишларига ҳам кўп нарса боғлиқ. Бу эса жамоамизнинг бир текисда ўйнашига имконият бермади. Аслида биз чемпионатда бундан ҳам яхшироқ ўринни эгаллашимиз мумкин эди. Лекин бутун мавсум давомида ҳам бизнинг ва футболчиларимизнинг асосий эътиборлари олимпия терма жамоасига қаратилганди. Чунки бизнинг 5-ўринни эгаллашимиздан ҳам кўра олимпия терма жамоамизнинг муваффақиятли иштирок этиши муҳим. Умид қиламанки, терма жамоамиз Осиё чемпионатида охиригача, яъни, 26 январь кунигача етиб боришади. Сўнг мусобақадан қайтиб келишгач, йигитларга дам берамиз. Кейин эса февраль ойига асосий эътиборимизни қаратиб, бутун таркиб билан Туркияда ёки бошқа жойда жиддий йиғин ўтказамиз. Тўғри, ҳозирда асосий таркиб аъзоларисиз шуғулланишимиз менга қийинчилик туғдириши мумкин. Бироқ йигитларимиз анчадан бери бирга ўйнаб келишяпти. Шу боис янги мавсум бошлангунигача бир-бирини тушуниш ҳолати муаммо туғдирмайди. Биз эса терма жамоамизнинг Олимпиада йўлланмасини қўлга киритиши учун барча нарсага тайёрмиз.

Шу ўринда бош мураббий «Насаф»нинг янги мавсум учун режалари қандайлиги ҳақида ҳам тўхталиб ўтди.

- 28 декабрга қадар Қаршида шуғулланамиз. Ўша куни эса Тошкентда «Бунёдкор» билан ўртоқлик учрашувини ўтказамиз. Шундан сўнг янги йилдан кейин яна ўзимизда йиғин ташкиллаштирамиз. Февраль ойида эса Туркияда йиғин ўтказмоқчимиз.

Яна бир асосий масала шундаки, охирги пайтларда Рўзиқул Бердиевнинг «Насаф»дан кетиши мумкинлиги борасидаги гап-сўзлар кўпайиб кетганди.  Айниқса, унинг «Навбаҳор» бошқарувини ўз қўлига олиши кўп муҳокамаларга сабаб бўлганди. Шу фурсатдан фойдаланган ҳолда унинг ўзидан ушбу масалага ҳам ойдинлик киритишини сўрадик.

- Яшириб нима қиламиз, чиндан ҳам менга «Навбаҳор» жамоасидан жиддий таклиф бўлди. Лекин мен бунга аниқ жавоб бермадим. Чунки жамоам менга ишонишда давом этса, «Насаф» билан ишимни давом эттириш ниятим борлиги ҳақида айтдим. Бор гап шу.

бердиев4

Демак, «Навбаҳор» ушбу мутахассисни олиб келишга қаттиқ ҳаракат қилган. Аммо нима учун Бердиев наманганликларнинг таклифига жиддий қарамади? Бу борада унинг ўзи шундай деди:

- Жиддий қарамаганимнинг сабаби, яна ўз жамоамда ишлашни хоҳлаганим билан боғлиқ. Биласиз, «Насаф»да кўп ишларни қилдик, ёшларни шакллантирдик. Клубда эса яна қиладиган ишларимиз бор ва уларни бажаришимиз керак.

Шунингдек, «Насаф»нинг бир қатор иқтидорли футболчиларига таклифлар борлиги ҳақида ҳам эшитмоқдамиз. Рўзиқул Бердиев эса Азиз Ғаниев, Шароф Муҳитдинов каби ўйинчиларнинг хорижда ўйнашини кўпроқ истаётгани ҳақида олдин ҳам айтганди…

- Бизнинг кўплаб футболчиларимизга жиддий таклифлар бўляпти. Лекин уларнинг шартномалари бор. Шу боис ҳаммасини клуб ҳал қилади. Кўпроқ кейинги йили «Насаф»нинг олдига қандай мақсад қўйилишига боғлиқ. Айни пайтда эса таркибимизда легионерлар шуғулланишяпти, уларни агентлар жўнатишган. Барчаси фақат кўрикда бўлиб туришибди. Биз оладиган бўлсак, асосан кучлироқ легионерлар керак бўлади. Ўртамиёналардан кўра ўзимизнинг ёшлар ўйнагани яхши. Академиямиздан яна янги иқтидорлар етишиб чиқмоқда. Уларга ҳам эътибор қаратишимиз керак бўлади, - деди Бердиев.

 

Фикрлар

Фикр қолдириш учун авторизациядан ўтинг!
SHAXBOZ Bekmurodov
25/12/2019 13:35
Ro‘ziqul ketsa Nasaf ni shu turishi ham yuqolib pro legaga tushub ketadi Ro‘ziqul B ayniqsa Nasaf ning asosiy raqiblari Paytaxt jamolari va Navbahorga utmashi kerak. Ro‘ziqul Sadullayivich Nasafni manashu darajaga kelishiga sizni hissangiz juda katta shuning uchun Nasafni yanada kuchli jamoga aylantiring, olg‘a Nasafim olg‘a Ro‘ziqul
&
Surxon turon
25/12/2019 16:01
Суперлигада камида бердиевга ӯхшаганидан 7.8та мураббий бӯлганда осиёда 1ё2чи ӯринларда бӯлардик
Абдусамат Жураев
25/12/2019 14:43
БАБАЯН ХАРОМ укаси Жорж Морж келди хаммасини Барби килди
Абдусамат Жураев
25/12/2019 14:42
Вакти соати келиб утарсизам Рузукул Навбахорга хозирча КАНЧЕЛЬСКИЙ биз Навбахор МУХЛИСЛАРИГА МАКУЛ уткан йили хам кетмасдан олдин 3 уринда эди хайдашмаганда камида БРОНЗА ва ОСИЕ ЛИГА плейф оффга олиб чикарди
&
GOAL
25/12/2019 13:42
Legioner kerak emas