РПЛ. Легионеримиз майдонга тушмаган ўтиш ўйинида "Уфа" тайёр ғалабани қўлдан бой берди

Россия премьер лигасига ўтиш ўйини доирасидаги "Оренбург" - "Уфа" баҳси якунланди. Унда жамоалар жанговар 2:2 ҳисобида дуранг ўйнади.

Ушбу ўйинда "Уфа" сафида ҳаракат қиладиган легионеримиз Остон Ўрунов сариқ карточкалари кўпайиб кетгани боис майдонга туширилмади.

Меҳмонлар дастлаб Агаларов ва Камиловнинг пенальтидан урган голлари эвазига ҳисобда олдинга ўтиб олганди. Бироқ кейин мезбонлар характер кўрсата олди ва Гойкович ҳамда Малихнинг голлари туфайли мувозанатни тиклади.

Шу тариқа, кимнинг премьер лигада иштирок этиш масаласи Бошқирдистонда ўтадиган учрашувда ҳал қилинадиган бўлди.