“Рубин” бош мураббийи “Нефтчи” билан ўйинга изоҳ берди

Россия Премьер-лигасининг иккинчи қисмига тайёргарлик кўраётган “Рубин” Туркиядаги ўқув-машғулот йиғини давомида навбатдаги ўртоқлик учрашувини Фарғонанинг “Нефтчи” жамоасига қарши ўтказди.

Белекдаги баҳс ўзбекистонлик футболчилар ғалабаси билан якунланди. Ягона гол Тома Табатадзе ҳисобига ёзилди.

Учрашувдан кейин “Рубин” бош мураббийи Рашид Раҳимов ўйинга изоҳ берди.

- Мен учун рақибларнинг кучли ва сифатли экани энг муҳим жиҳат ҳисобланади. Бу галги рақиб охирги учрашув ўтказаётганидек тўлиқ тайёр ҳолатда майдонга тушди.

Биз бундай қила олмаймиз, чунки машғулотлар дастури доирасида ишлашимизга тўғри келмоқда. Бу жараёнда бор эътиборни фақат ўйинга қарата олмаймиз. Биз бундай учрашувларда муаммоларимиз қаерда эканини билиб олишимиз керак.

Ўйин бўйича устунлик биз томонда бўлди. Дастлабки уч дақиқа ичида гол уришимиз мумкин эди, ҳар ҳолда ёмон ўйнамадик, лекин “Нефтчи” стандарт вазиятдан дарвозамизни ишғол қилди. Ўйиндаги устунлик диққатни йўқотган пайтда ўз-ўзидан барҳам топади, - деди Рашид Раҳимов.

“Нефтчи” Ўзбекистон чемпионатининг янги мавсумидаги илк учрашувини 8 март куни ўтказади. Шу куни фарғоналиклар пойтахтда “Бунёдкор” меҳмони бўлади.