Рубин Хебайга Туркиянинг бирданига учта клуби қизиқяпти

Айни пайтда Суперлигада 10 та гол билан тўпурарлар орасида бораётган ва жорий мавсумда чемпионатимизнинг кашфиёт легионерларидан бири сифатида тилга олинаётган "Андижон"нинг албаниялик ҳужумчиси Рубин Хебай яна барчанинг диққат-марказида. Боиси, унга хориждан кўз тикаётганлар пайдо бўлмоқда.

Жумладан, Туркия Суперлигасида иштирок этаётган “Анкарагюджю”, “Ризеспор” ҳамда “Аланьяспор” клублари Хебайга қизиқишяпти. Бу масала бўйича “Андижон” клуби бош директорига алоқага чиқишган ва турклар таклиф қилаётган трансфер суммаси “Андижон” клуби томонидан Хебайдек тўпурарга муносиб эмас деб ҳисобланмоқда. Маълумот учун, Туркияда трансфер ойнаси 15 сентябрда ёпилади.

Юқорида номлари келтирилган учала клуб номидан иш юритаётган туркиялик агентларнинг олиб бораётган музокаралари қандай якун топишини яқин вақтлар ичида билиб оламиз.

Маълумки, Рубин Хебай “Андижон”га жорий йил қишки трансфер ойнасининг сўнгги кунида қўшилган бўлиб, 2 йиллик шартнома имзоланган. Клубга эса уни Туркиянинг бошқа бир клуби -  “Антальяспор” менежерлари таклиф қилишган.

Эслатиб ўтамиз, албаниялик легионернинг “Андижон” билан имзоланган шартномаси 2024 йилнинг охирига қадар амал қилади.

“Андижон” матбуот хизмати.