Руфат Акрамхўжаев: "Мухлисларнинг олқиши "Андижон"га катта ёрдам берди"

“Андижон” – “Сурхон” ўртасидаги ўйиндан кейин меҳмонлар бош мураббийи Руфат Акрамхўжаев матбуот анжуманида иштирок этди.

- Йигитлар ўзини йўқотиб қўйгани йўқ. Яхши ўйнашди, вазиятлар яратдик. Имкониятлардан унумли фойдаланганимизда ҳисоб бошқача бўларди. Иккинчи бўлимда устунликка эга бўлдик. Ҳужумчиларни ҳатто тўрттагача кўпайтирдик ва ҳимоячиларни учтага қисқартирдик. Шунгинг эвазига “Андижон”да имкониятлар бўлди, улар қарши ҳужумда яхши ўйнашди. Футболчиларимизга раҳмат, борини беришди.

- Стадиондаги муҳит ҳақида фикрингиз қандай? Бу жамоангизга қанчалик таъсир қилди?

- Муҳит ажойиб бўлди. Мухлисларга тасанно. Ишқибозларнинг олқиши “Андижон” клубига катта ёрдам берди. Бизга ҳам бундай муҳитда ўйнаш ёқимли. Ҳеч қанақа босим бўлмади. Фақат стандартдан киритилган ягона гол ўйин тақдирини ҳал қилиб қўйди.

- Бугунги ўйинда асосий эътирозингиз кимга бўлди?

- Ўйин пайтида эътирозлар бўлади. Аммо ўйин бўйича футболчиларга ҳеч қандай эътирозим йўқ. Ҳеч ким хатодан кафолатланмаган.

- Биринчи бўлим охирида ёрдамчи ҳакамга жиддий эътироз билдирдингиз. Бу нима билан боғлиқ?

- Бир вазиятда Эсонқуловни йиқитишди. Мен фақат кўрган нарсамни айтяпман. Аммо ҳакамларнинг ишига аралашмайман. Шунчаки ҳар доим ҳакамдан нимага, деб сўрайман. Уни жавобини билдим, шу холос.

- Ўйин охирида жамоангиз фейр-плейга амал қилмади. Бу сизнинг кўрсатмангизмиди?

- Фэйр-плей, деганда футболчи футболчини ҳурмат қилиши тушунилади, тўғрими? Вақт чўзаётгани кўриниб турганди. Узр сўрайман, бундай фэйр-плей бизга тўғри келмайди. Кўрган бўлсангиз, йигитларимиз ўтган ўйинда ҳам вақт чўзишгани йўқ. Чиройли футбол тарафдоримиз. Бизнинг мақсадимиз курашувчан жамоа тузиш. Қолганини вақт кўрсатади. Қайси ўринда бўлишимизни мавсум охирида кўрамиз. Ўзим максималистман.