Руслан Жиянов: "Олимпик"да ўйнаганман ва кўплаб дўстларим бор, аммо бўлажак баҳсда бир-биримизга рақибмиз"

Ўзбекистон Суперлигасининг 10-туридан ўрин олган “Навбаҳор” – “Олимпик” жамоалари ўртасидаги учрашув арафасида “лочинлар”нинг маҳоратли ярим ҳимоячиси Русланбек Жиянов бўлажак ўйин ҳақидаги фикрлари билан ўртоқлашди.

- Бўлажак рақибимиз “Олимпик” жорий мавсум баҳсларини яхши ўтказмоқда ва етакчи жамоаларга муносиб қаршилик кўрсата олади. Шу боис, мазкур беллашувнинг кескин курашлар остида ҳамда шиддатли тарзда кечиши эҳтимоли юқори.

Хабарингиз бор, бир пайтлари “Олимпик”да ўйнаганман ва ушбу жамоа таркибида кўплаб дўстларим бор. Шунингдек, уларнинг кўпчилиги билан апрель ойида Қатарда бўлиб ўтган U-23 Осиё чемпионатида бирга тўп тепиб, юртимиз тарихида илк марта Олимпиада йўлланмасини қўлга киритдик.

Аммо бўлажак ўйинда бир-биримизга рақиб сифатида майдонга тушамиз.       

Ўтган тур баҳсида “Металлург” билан дуранг ўйнаб, мухлисларни ранжитиб қўйдик. Шу боис, ушбу ўйинда майдонга ўзгача иштиёқда тушиб, ғалаба қозониш ҳамда мухлисларга қувонч улашиш учун барча имкониятимизни ишга соламиз. 

Ишқибозлардан эса жамоамизни бевосита стадионда муносиб тарзда қўллаб-қувватлаб, ғалабамизга мададкор бўлишларини сўраб қоламан. Биз эса таъкидлаганимдек, уларнинг ишончларини оқлаш, уйларига хурсанд ҳолда қайтишлари учун рақибни мағлубиятга учратишга ҳаракат қиламиз.

Фурсатдан фойдаланиб, бизга барча шароитларни яратиб бераётган Наманган вилояти ҳокими Шавкатжон Шокиржанович Абдураззоқов ва “Навбаҳор” ПФК вице-президенти Отабек Арифович Саматовларга жамоамиз номидан ўз миннатдорчилигимизни билдираман.

Жорий мавсумда жамоамиз ўз олдига қўйган мақсадига эришади, деган умиддаман,  - деди Русланбек Жиянов. 

“Навбаҳор” ПФК матбуот хизмати.